CAB – 2016 vâta Siaha liata Republic Day ‘boycott’-na hlaotloh

Citizenship Amendment Bill-2016 kholeina palâsana châta Mizoram liata NGO nano nanopazy ta ama pakhâna hryta Siaha khihpi liata chhao Py nano nanopazy ta ama ‘Boycott’-na ry liata India Republic Day ei 70-na cha aheilyu kawpa ta hmâpa a châ.

MTP Gen.HQ, MSO Gen.HQ nata MCHP Gen.HQ : Siaha-zy ta zawpi ahy hmahta a hlao lei awpa ta ama tahna laotlohpa ta, Siaha khihpi liata India Republic Day a hmâna awpa ta ryrao chhieliena su, Siaha Vaihpi tlyliah liata he noh he a hmâh leipa ta, Siaha DC Office tlyhmia liata a heilyu kawpa ta Siaha DC Pihnô Harleen Kaur, IAS chata India Flag pakaipa ta, daihti he a hmâpa a châ.

Zâhnia pachyh nohta India Republic Day, Siaha khihpi liata â hmâna liana heta daihti buakha chhôh, Flag pakaina daihti deita hmâpa a châpa hawhta pahnopa châ ta; Py nano nanopazy cha he daihti chhôh zydua heta ama duty hra. He Republic Day ‘Boycott’-na he a hlaotloh kawpa hawhta pahnopa a châ.