Abeipanoh Sermon : KEI HE MARARÂH MISSIONARY-ZY LÔBÔ CHA EI CHÂ - Rev Dr Laiu Fachhai

Rev Dr Laiu Fachhai

Eima missionaryzy thlâ liata chahawhta a paropa ta tlyma, a formal kawpa ta tlyma, thlah ei chhâpa â thei leipa na ta, châhrasala ama thlâ ei tlyna maih nata, ama o ei tlyna maih ta amâ piepasaina nata Marapa kyh maniah ama pachâna zydua vâta Beipa lâta alyna bie ei reih tyh. 

Eima missionaryzy kha eima râh liata thokha ta ama luh a pabu ei ta a rôhnah hmeihseih. Kyh maniah ama pachâna a palâsa. Ama luh a pabu leipa ta â lie hawpazy chhao kha kyh maniah ama pchâ kaw hra. Mara râh he missionaryzy ta ama luh amâ pabu thluna râh a y chhôhpa deikua vaw châ hlei ma pi. Missionaryzy ta ama luh amâ pabu thluna râh a hluh kaw. Hehawhta missionaryzy ta ama chakaona râhzy liata ama luh amâ pabu laihpa he ta ama chakaona râhzy kyh ama pachâna palâsa ta a rôhnah hmeihseih. Ama raihria phapazy ta, cha ama kyhpachâna cha a pa-isa via heih. 

Kei ta cha, vaw tah thlah ha tua sa la; eima missionaryzy eima râh liata ama luh amâ pabupa rôhnah ei tahpa vâta nata ama chakaona ei pasôna palâsa nawpa ta ei hro ta missionaryzy chô liata hehawhta alyna bie rei lymâ ei chhuah. Missionaryzy lôbô hrohpa châ lymâ ei chhuah:

1. Missionaryzy ta Mara reih Biehrai ryusôhpa maniah amâ hipa he rei lymâ ta, eima missionaryzy ta Biehrai maniah ama pachupa kha zy lymâ ta, missionaryzy vaw tlôkheipa Biehria biezy – ngâchhihna, adona, kyhpachâna, pathaihna, tiama hriapasana, zawngiahna, ngiathaina, etc – zy he ei hro liata hmô theipa ta a y lymâ thei nawpa ta tiama ei papua lymâ.

2. Châropa ta maniah ama taopapa, ryusôhpa maniah amâ hipa Mara reih he chei ta, roh hra ta, pasô ta, pabohsa ta, palaiseihsa ei chhuah lymâ.

3. Missionaryzy ta kô 100 a vaw sie haw chiehpa liata Mara râh râhzohpa lâ thâtihpha ama vaw tlôkheipa hawhna kha ta, kei chhao ta thâtihpha chhona rai hria hra awpa ta a hlâ nah ta, râhzohpa lâ ei sie hra.

Daihti sie laih aw ta, ku ta taopa nata ropa missionaryzy lôbô rao laih thei aw ta, ama lôbô liata châropa chhao a tleih laih thei. Ama rupa chhao hmy laih aw ta, a lei laih thei hra. Châhrasala ama lôbô hmeihseihpa deikua la lei khao aw vei. Ama lôbô hmeihseihpa cha keima hawhta missionaryzy taopa Mara reih pasô ta, ama vaw tlôkheipa thâtihpha bie hawhta hro âchhuah ta, cha thâtihpha cha chho pachhuah laih lymâ âchhuhpazy he missionaryzy lôbô hmeihseihpazy cha châ pi ta, Mara râh, Marapa chi nah pho nata Mara râh awnanopa â dua chhôh zydua cha he lôbô he rao ta a lei khao lei awpa dei châ leipa ta, chhâzaw ta a duah awpa lôbô tlao a châ haw hri.

EIMA MISSIONARYZY KHA! 

Khazohpa nah Marasawzy kyhpachâ vâ,

Thlahlôh lyna pina râh siesai ta,

Mara tlâh lia riethei to tao ta za y ei;

A sôh zie, Khazoh a awna ei,

Eima missionaryzy kha!

Pahno thai mâh lei mahnô-mahpawzy ta

Ama zâ ly leipa chhao ta,

Za pacha thai ei ta,

Mara râh châta byhnâ khâ za aw tyh ei;

Noâh â chhih zie, ama kyhpachâna,

Eima missionaryzy kha!

‘A aw’ hnei lei Mara reih cha

Reih hlô rôhnah ta tao ha ei ta,

Mo pahno lei Marasawzy cha

Phopi rôhnah ta tao ha ei;

Riah chichhihna Mara râh chhao

Immanuel râh thlalôh vaw châ haw;

A rôhnah zie, ama hriapasana,

Eima missionaryzy kha!

Pina râh lâ a lie heih awpa chhao

Tlaichhai thei awpa ta rao leipa ei ta,

Ama kyhpachâpa Mara râh liata,

Ama kyhpachâpa Marasawzy hnohta,

Ama chhâ tlao palo ha hri ei;

 i pachai tlai, amâ piena,

Mara missionaryzy kha!

Eima missionaryzy kha,

Ama hnazô hmô khao vei hr’ei si,

Ama kyhpachâna vâ thei ta khâ ama y;

Mara chhâ zydua lia ama moh lei khao aw vei.

A pasa khoh kaw tyh, âmo vâna deikua,

Eima missionaryzy kha!