Premier League : A chô chaipa liata Liverpool ama kaw y ha heih

Liverpool chata ama Premier League tlyliah, Anfield liata ama khichhaipa Bournemouth cha 3-0 ta vaw pahniepa ta, Manchester City chhaopa ta a chô chai liata ama kaw y ha heih.

Noh 3 a khô hapa liana khata âmo hlâta khaih kha ta akhaih hluh viapa, Manchester City ta goal difference liata Liverpool he chhaopa ta EPL chô chai liata buakha y hmâ ei ta; anodeikua zâhnia pachyhzâ liata Anfield liata pahniena ama to heihpa vâta a chô chai liata ama kaw y lilaw ha heih.

Akhaihna pathaopa a châ tawhta Bournemouth lâ tawhta Ryan Fraser ta Liverpool kaovaihtuhpa  Alisson za pachhiparypa ta goal lâ za chapie ta; anodeikua Alisson châta rairuna y hraoh vei. He khai tawhta cha Liverpool châta rairuna muarua y khao leipa ta, Sadio Mane ta James Milner ta a kâ lâ tawhta ball avaw pathluahpa cha hmia amâ sahna châ awpa ta a za khôpâ ha.

Liverpool goal 2-na he Georginio Wijnaldum ta za khô heihpa ta, 2-0 ta châ ta. Liverpool goal hnôh chaipa he Naby Keita nata Roberto Firmino ta â ngia kawpa ta ball amâ pie pachhuah tawhta a nao kawpa ta Mohamed Salah ta a za khôpa a châ. Hetana heta Salah heta atahmâ Season liata ataopasuana nano nanopa liata goal 20 a khô ha.

Atazâ he Manchester City ta Chelsea vaw khichhai aw ei ta, amâ khaihna chhichâna reizie ta hmia asahtuhpa he â nano heih thei.

Atahmâ duasu liata Liverpool ta khaih 26 tawhta Point 65 hmôpa ta hmia asah ei ta; Man City heta khaih 26 tawhta Point 62 hmôpa ta ama pazi hai.