Arakan Army biephuahtuhpa ta Myanmar pheisaihzy bao lei awpa ta India ahaw

The Irrawady : Paletwa Township, Chin State, Myanmar ôna chhôh Beinô chavah chaby liata Arakan Army nata Myanmar pheisaihzy likah buana vâta râhri vaih awpa nata buana vâta riahpaihpa (refugee) zy buakhei awpa India ta a pheisaih zy Mizoram liata a kaw sona chôchâh liata, Arakan Army biephuahtuhpa U Khine Thukha chata, India sawhkhâ ta pheisaih 500 hlei rachhôh cha Indo-Myanmar râhri, Mizoram liata Parva khih tawhta Lôpu khih, km 22 ta â hlapazy liata a soh tahpa eima pahno, tahpa 'The Irrawady' thâtihbu ta amâ pakyhna liata a rei.

U Khine Thukha chata he hawhta India sawhkhâ ta râhri zy liata pheisaih a kaw palypa he atlia via liata cha a eikhana a châ tahpa ta, U Khine chata India pheisaihzy nata Myanmar pheisaihzy he AA zy adyuhna kyh liata ama hriaparaoh na ta pangiasana a lai kaw, a tah hra.

AA biephuahtuhpa U Khine chata, “India sawhkhâ hnohta ei bietapa cha ICC-wanted war criminals (Myanmar pheisaihzy) â hrialâhkheipa he hmo dopa châ vei. India heta ICC criminal zy á pakaoh awpa châ vei,” tahpa ta kô 2017 liata Rohingya Muslim zy chôta amâ pielyudâh vâta 'War crime' biebuapa a hneipa Myanmar pheisaihzy bao lei awpa ta India sawhkhâ â haw.

He hawhta a châ nona heta Burmese military officer zy nata Indian army officer zy cha aru lâta amâ hmôpa hawhta Social media liata palâsapa châ ta. 'The Irrawaddy' thâtihbu ta he chôchâh hiahrih awpa ta Brig-Gen Zaw Min Tun, Military’s Office of the Commander-in-Chief biephuahtuhpa phone ta bie a chho amâ chhuahpa cha a hlaotloh vei.

Atliata AA nata Myanmar pheisaihzy â kana vâta Paletwa tawhta Mizoram râhri ngaipa ta avaw rãhpa y ei ta, pakhazie tlaima ama châ tahpa pahnopa châ vei.

Arakan Army ta ama 'official website' liata ama palâsana dâh ta cha Myanmar pheisaihzy nahta Rathedaung Township chhôh liata Yae Soe Chaung khih liata târi 14 February khata â ka ei ta, Myanmar pheisaih 10 ama kasao tahpa palâsa ei ta. Târi 17 February khata Ponnagyun Township liata Myanmar pheisaih kiana motor cha bomb ta tlahnao ei ta, he liana heta pheisaih hluhpi ta hmah phaohpa ta, Sittwe liata mohôhpa ama chã, ama ta.

- The Irrawaddy.com
Representative Image (Assam Rifles in Mizoram)

READ Source :
https://www.irrawaddy.com/news/burma/indian-troops-seal-off-india-myanmar-border.html