“Ei nâ, Vârâh liata ei cha vaw hâ aw sy”

“Ei nâ Kyh ei cha pachâ.” He he chapaw hawtipa, pasana a khiakhi kawpa vâta thina lytlâh a khô haipa ta a nô hnohta bie a rei hnôh chaipa a châ. Chapaw hawtipa, kô 4 deita uhtheipa Nolan Scully heta thina a hmiachhy hai nona heta, a nô cha ‘Vârâh liata ei cha vaw hâ la y, ei nâ’ tahpa ta Khazohpa liata khâchâ ngiapâna a hneinazie a palâsa.He chapaw hawtipa Nolan thâtih heta chyhsa hluhpi palôh pahnie ta, mothlih pathlasa ta, cha nota ngiapâna kyh liata ama hro chhao athata a panano hra!

Nolan thâtih he a chhôhkhazy ta Facebook Page taopa ta khizaw hmô awpa ta tawhpapua ei ta; a thâtih palôh pahnie kawpa chata chyhsa za hluhpi palôh a panano hmeiseih!

Nolan he pasana chichhih kawpa, ‘rhabdomyosarcoma’ ama tahpa vâta thina lytlâh a khô ha awpa duasu liata â dua hai nota, a chhôhkhazy ta a thâtih palôh pahnie kawpa he chyhsa hropazy chhaota ama vaw reih hrana hâhta tahpa ta Facebook page pahy ei ta. Kô 3 deita a châ nota he pasana a hneipa chata, kô 4 a châna kô liata he pasana pahnie khao leipa ta, tlyzaw pahâna râhpha ngaipa ta a lei hro a siesai hapa a châ.

Facebook Page tawhta Nolan thâtih vaw pahnotuhpazy palôh keichhei ta, chapaw hawtipa, kô 4 deita uhtheipa, viasa nata chhôhkha tlaichhai lichih ta a hrona lapa ta a y hapa cha pahnothai a ru tah ei ta, ama raithli loh leithei vei. Châhrasala, a thi chyta a biereipazy nata Khazohpa liata khâchâ ngâna a hneipazy chata chyhsa hluhpi cha ngiapâna lâthlôh liata â chhi leithei vei!

Nolan heta a paw Jonathan hawhta khihtlâh châta meikâpachhaituhpa (Firefigter) raihriapa ta, ama khihtlâh châta chakaona rai hria awpa khoh ngaita kaw tyh ta. A paw Jonathan he ama khih, Leonardtown Volunteer Fire Department liata hyutuhpa rai a hriapa a châ. Anodeikua a sawchapawpa Cancer pasana ama hmô papua patawnah ta a rai he a bâsaipâ hapa a châ.

Nolan ta rai a pasâhsa kaw heihpa cha Police rai he châ ta. Thohna-O liata a y nota Police Commissioner ta he a hmo kho kawpa he pahnopa ta, Honorary Police Officer ta a lapangia. He noh rakha tawhna heta "Sgt. Rollin' Nolan” tahpa pahnopa avaw châ ha hrapa a châ.

A thâtih vaw pahnotuhpa maihta Nolan a châhkheipa ta, hmotaopa nata reikah ta athata ano amâ châhkheina ama vaw palâsa lymâ. Hmia pahnoleipa, Internet tawhta a thâtih vaw pahnotuhpazy nata Dawhty, ano mohôhtuhpazy taihta Nolan cha vaw tlâh para thei sala tahpa cha ama nohto pachâna liata khâ â zâ rie chaipa za châ ta. Châhrasapa, a pasana a khiakhi kawpa cha hawtipa, kô 4-pa châta cha pahnie thei rimâ awpa châ vei!

Nolan nô, Ruth ta a sawchapaw Nolan hrona noh cha a chhâ ha bâ aw tahpa ama pahno nota ama yna dâh he hawhna heta a rei :

“Ano mohôhtuhpa zydua nahta atyuhpahmaoh pi ta. A dawhty, Oncologist (Cancer dawhty) mopadei liana chata pasana rei papua thai lei awpa kei hmô na ta. He dawhty nô he hmoto a châna kakuapa ta khâ miah chho lymâtuhpa nata eima pasana nata taona zydua liata khâ miah taokhei lymâtuhpa châ ta. Eima sawchapaw pasana Mestatic Alveolar Rhabdomyosarcoma cha a sapa liata â hiezawh via lymâ tahpa miah chho ta. Thohna ama piepazy chhao cha a pasana cha adyuh khao leipa ta, pahnie khao vei, tahpa miah chhopa ta, a daihti hnôhpa â hnia via lymâ ha tahpa miah chhopâ ha hra.”

Nolan nô nata pawzy châta he hawhpa thâtih tluta ama palôh pakeichheisatuh awpa a y rai aw mâ! Ruth, Nolan nô chata a thatlôna zydua hruapa ta a sawchapaw, thina lytlâh liata a khô haipa Nolan chho awpa cha a ngiaroh chaimâh tlai na. Châhrasala, chapaw hawtipa kô 4-pa ta a lei hrona ta a siesai hai tahpa avaw theipa cha tlao avaw chyh-eih thai kaw. Thina chi vei tahpa a reipa dei châ leipa ta, a nô cha, ‘Vârâh liata ei cha vaw hâ aw’ tlao tahpa ta â vaw chhy!

Nolan nô ta Nolan pasana rakhô liata â zia thlâh ha nota bielôhawhpa ama reipa cha he hawhna heta Facebook Page liata a tawhpapua :

“A kiah liata a zâ tyuhpa ta, a luh nata ei luh cha za patyh na ta :

Ruth: Poot (A awna dâh tyh), na husopa kha a pasapâ tyh tah tyh?

Nolan: Um, ei nâ a pasapâ tyh.

Ruth: Ei dao, pasana to rai ta a chaby tah tyh?

Nolan: (A phei lâ za mohpa ta) Um.

Ruth: Poot, he Cancer pasana khâhma châ vei. Nâ dyuh awpa chhao a ngiah khao vei.

Nolan: (Alyna ta kaw bie ta) A ngiah khao vei mâ??!! Châhrasala ei nâ nâma châta ei dyuh lymâ aw!!

Ruth: Byuh ei Dao!! Cha cha mâ khâ na vaw tao tyhpa?? Nâma nô châta pasana a dyuhpa cha??

Nolan: Um!!

Ruth: Nolan Ray, na nô raihriapa cha khâpa châ aw?

Nolan: Ei boh thei n’awpa tan a khâsiapa! (Kaw pakieh ta)

Ruth: Daochai… atahmâ la tao thei rimâ khao vana. Ei cha pabohsa theina a y chhôhpa cha Vârâh liata â boh kawpa ta cha pa-ysapa deita a châ ha bâ. (A palôh cha keichhei leithei vei)

Nolan: Khiahta cha vârâh lâ khy na tan â khy hlâhlei vaw palao na ta tah tyh ei nâ! Vârâh lâ nâ khy hra aw tah tyh?

Ruth: Liahva cha!! Cha hawhta na nô he siesai thei chakhyh va chi!!

Nolan: Ei châ ly tu ha ei nâ!!! Vârâh liana chata Hunter zy, Brylee nata Henry zy chhaota eimâ kaw chatôh aw!!”

Khi khi Nolan a thi chyta a nô nahta ama bielôhawh reipa cha a châ!

Pasana a khiakhi kawpa vâta kô 4-ta uhtheipa, chapaw hawtipa, ahy peihria leipa Nolan cha a lei hrona pahleipa ta, vâ hrona a hly awpa ta a nô nata paw siesaipa ta a pahâ ha ta; châhrasala, a ngiapâna nata a hro tlaichhai a chhihpa nata a chhyuna zydua chata chyhsa hluhpi pahnie ta, ano vâta chyhsa hluhpi ta Khazohpa amâ vaw hnia via ha heihpa a châ.

‘Ei Nâ, Vârâh liata ei cha vaw hâ la y’ a tahpa hawh tlaita, nâma nata kei chhao he, Vârâh liata hâ tlâh awpa ta eima hro eima hmâh hra ma? A mohpasiapa ta, Vârâh liata hâ tlâh châ awpa ta hro hmâh chyu suh vy.