Premier League : Liverpool nata Man City likah liata Point 3 ngâlâh a y bâ

Premier League hmia a sah haituhpa Liverpool cha a peimawh chaina daihti liata pao heihpa ta, West Ham tlyliah liata Point kha deita ama hlao papua theipa vâta âmo pazituhpa, Manchester City nahta ama likah liata Point 3 deita y bâpa ta, EPL Nyungiapa chalo awpa ta a râpasuana cha a kawh kawpa ta pahypa a châ ha heih.

Manchester City heta a khô hapa Abeipa noh khata Arsenal pahnie ei ta. Mylâ Pakhy zâ ta Everton ama pahnie tlai khiahta cha Liverpool ama chhao ha aw. Tottenham chhao nyungiapa paza a chhuahpa ta a kaw hnia via lymâ hra ei ta, Point 57 hmô hapa ta, Liverpool hlâta Point 5 deita amâ hnai via chy.

Premier League nyungiapa chalo awpa amâ chhuahna liata Liverpool heta rairuna amâ kaw tyh via lymâ chy awpa za lyu kaw heih ta, ama player phahnai kawpa thokha - Dejan Lovren, Jordan Henderson, Georginio Wijnaldum, Joe Gomez and Trent Alexander-Arnold zy cha hmah ama phaohpa vâta tlyliah liata hmâh thei vei ei.

Liverpool Coach Klopp chata, “Eimâ chhuahnohna a pha kaw taraw mâh maw..Point 1 deita dia eima hlao papua thei” tahpa ta a palôh châ tu muarua vei.

West Ham tlyliah liata khichhaipa, hmia amâ sahna Point 6 ta pasihsa via awpa a chhuahtuhpa Liverpool heta Sadio Mane ta minute 22-na liata goal a khôpa hmâpa ta hmia â sah ei ta.

West Ham ta he he achhypalie achhuahpa ta Liverpool kao chaby ama by pasa kaw. Ama tiaman nata tei hohna cha hlaotlohpa ta, goal ama papua tawhta minute 6 a khô dyuta tahpa liata Liverpool defender-zy a piechheipa pho pasupa ta Michail Antonio ta amâ pasuna goal he za khô ta, daihti chhâna taihta goal hropa a ngiachhi khao leipa ta 1-1 ta ama pai hapa a châ.

Atahmâ duasu liata Liverpool heta Premier League point table liata khaih 25 tawhta Point 62 hmôpa ta hmia a sah hai ei ta; Manchester City ta khaih 25 tawhta Point 59 hmôpa ta pazi ei ta, Tottenham Hotspur ta khaih 25 tawhta Point 57 hmôpa ta sâthôhna liata ama y hai.