Jammu & Kashmir : Maheipazy ta ama tlahnaona liata India pheisaih 44 ama thi

Zâhnia Pohbie noh (14.2.2019) liata Jammu & Kashmir liata maheipazy (terrorists) ta India pheisaih, CRPF zy kiana convoy, bomb hmâpa ta ama tlahnaona rarô-y kawpa liata India pheisaih 44 ta hrona ama pahlei.

India Today ta a palâsana dâh ta, India pheisaihzy kiana Convoy (motor sahlaota a pazipa) he Pulwama ngaipa ta Srinagar-Jammu lâlai, Srinagar tawhta km 20 rachhôh ã hlapa liata amâ râ ngâ nota thithlutuhpa (suicide bomber) pakha ta SUV motor liata Bomb kg 300 daihmâ phaohpa ta pheisaih motor 70 sahlaota â pazi haipa hryta Bus supa ta, bomb he a papa hapa a chã. He bomb phaohpa SUV ta a kei supa Bus liana heta pheisaih 39 ama kiah.

He bomb-papa liana heta pheisaih 44 thipã ei ta, a thipazie he ama pôh via na ta pangiasapa a châ.

He India pheisaihzy tlahnaona rarô-y kawpa he Pakistan-liata supi a hneipa Islamist maheipa py 'Jaish-e-Mohammad' chata âmo taopa tahpa phuah ha ei ta. Bomb hmâpa ta India pheisaihzy thithlutuhpa, SUV haohtuhpa Adil Ahmad Dar cha âmo ta ama pataosapa a châ, ama tah hra.

He India pheisaihzy tlahnaona he kô 1989 rakha tawhta Kashmir liata India pheisaih tlahnaona a tlôpa liata ama thi hluh chaina daihti a châ.

Pakistan sawhkhâ chata he hmotlôpa rarô-y kawpa liana heta ahlaohlina hnei vei, tahpa thlai phuahpâ ha ta; he atlahnaona rarô-y kawpa he India sawhkhâ, opposition Party, zawpi nata khizaw râh nano nanopazy ta maochhiena reikah ama papua lymâ.