‘Khazohpa ta Donald Trump he US President châ awpa ta a khoh’ – Sarah Sanders

White House Press Secretary Sarah Sanders chata Christian Broadcasting Network ta ama hiahrihna â chhyna liata, “Khazohpa ta Donald Trump he US President châ awpa ta a khoh” a ta.

Donald Trump seisiatuhpazy hmiakô liata khâchâ â châh tyhtuhpa Sarah Sanders chata CBN ta amâ pakyhna liana heta, “Khazohpa ta chyhsa ahyrai he maophaohna nata châna nano nanopa liata y chyu awpa ta miah rao khai ta, Donald Trump chhao he Khazohpa ta President châ awpa ta a khoh” a ta.

A rei lymâna liata, “Ngiapâtuhpazy ta ama pachâ peimawhpa hmo-taohriana kyh liata Trump heta rai pha kawpa a hriapa ta ei pahno” a tah hra.

He hleikhôna heta Sarah heta CBN hnohna heta, “Kurdish krizyhpazy pabohsa awpa â chhuahzie cha Syria tawhta US pheisaihzy lapapua awpa ta bie a papua tawhna khata â lâpasia kaw” a tah hra.