Nôvah rarô ypa – Ama saw 13-pazy taolapa ta hraikhôhtuhpazy thailei pachâsapa ama châ haw
LOS ANGELES: California, USA liata nôvah baokha, ama saw 13 – Kô 3-pa
tawhta kô 30-pazy - hryta 12 taolapa ta, O liata hraikhôh tuhpazy cha thailei
pachâsapa ama châ.
David Allen Turpin, 57, nata a lahpinô Louise Anna Turpin, 50, zy
he moleina lai kawpa biebuapa 14 liata thailei pachâsapa châ ei ta, he biebuapa
hry liana heta ama sawnah taolana â hlao hra tahpa Riverside County District
Attorney Office chata a palâsa.
District Attorney Michael Hestrin chata, "Court liata
ryureituhpa ei châ chhôhta he hawhpa tluta hawtipa chôta peihriana laipa nata
rarô ypa he atyh mâh vana," a ta.
Hestrin chata henah nôvahta ama thaileina amâ phuah hapa he vâhnei
â chhih kaw, ama saw ngiachhie â chhi kawpa sahlaozy ta ama nô nata paw hmiakô
liata amah mo a tyhpa ama rei awpa â ngiah leipa ta a tahpâ hra.
Turpin-nah nôvah he ama sawnah, kô 3 tawhta kô 30-pa. 12-zy ama
taolana vâna heta hrochhôh lô-O liata amâ tâh aw.
Henah nôvah biebuapa, peihriana lai kawpa he zâkô ta ama sawchanô
pakha, kô 17-ta uhtheipa Jordan cha ama pahrâna-O Perris, Los Angeles liata a
nô nata pawzy ta ama hraikôhna tawhtapa â râpapuapa ta, Emergency Service a
phone tawhta khizaw ta pahnopa ta, he hawhta ama sawnah, ama thisaih a zaopazy
tlaita ama taola thlâh hapa he khizaw ta a rarô y ta, ama maochhie hmeiseihpa
kha a châ.
'Bâhliah miah ama paky'
Ama sawchanô â râpapuapa ta
a reina dâh liata cha, a hawti viapa panozy chhochhi cha thua bâhliah
paky ei ta, rakhô liata buhpâpa ta, ama buhna â i kawpa vâta ama thihnia
chhaota ama y thlâh ha, a ta.
A rei lymâna liata cha, "Pua beih va na" tahpa ta Emergency
a phone nona heta a reipâ hra.
He hleikhôna heta ama O cha pualei/ a sihny kaw ta, a roh chhie ngâsâ
ha ta, a unawh hropazy cha ama riethei ngaita kaw bâ, tahpa ta, "Tao lei
awpa miah ama tahpa eima tao/hria tlamaw khiahta cha bâhliah (Chain) miah paky
ha tyh ei," a ta. "A châhta cha ei narô sahlaozy cha ama bâhliah a
kyna a pasa tu hapa vâta ama kaw cha papuapâ ngâkaw tyh" a tah hra.
He chanô thyudyupa, ama O tawhta â râpapuapa apakyhtuhpa Police
chata, chanô cha a zaoh tu hapa vâta nata a sabia a chhie tu hapa vâta chanô
hawtipa khiahma a tah tuana zie a reih hra.
He chanô heta, ama nô nata paw chata nohkha ta dawh 20 pamôsa
raruah ei ta, zâcho ta my pati ama paniesa tyh, tahpa a rei hra.
He hawtinah he athata taolapa châ tyh ei ta, kô kha ta ei kha ama
ngai pasisa ei ta, ama hnatlâna/hri-ia duasu mopasia awpa ta dawhty ngaikhei
beih hra vei ei.
He hleikhôna heta he hawtinah he ama ku amâ si nota ama kupazah
rakha tawhta a chô lâ a dâ rai rai khiahta cha ti â hriahrâpa hawhta ama nô
nata paw zy heta baipa ta, bâhliah thlai ama paky ha heih tyh.
No comments