Dr. K Robin, Head of Department, History & Ethnography Department Head of Department, MZU alykheina hnei

Zâhnia târi noh 1 chutyh noh,zâlâ daw 1:30pm pa khata Siaha District : Mizoram University Campus liata achuhaipazy ta *Sir. Dr. K Robin, History & Ethnography Department* liata *Head of Department(HOD)* a châna alykheina nata palyupalihna daihti hmâpa châta,he daihti he ama pahrâna O Seventh Day tlâh liata hmâpa a châ.

Daihti chhithatuhpa St. John Solo(M.A History 2nd sem.) ta pathaona nata Abeipa lâta pavaosana thlahchhâna hnei awpata St N. Lalpianpuia(Apian)M.Sc, B.Ed 4th semester hruata, chakhai tawhta chhithatuhpa ta he hawhpa daihti pachhuahpanoh a châna chhâpazy, keimo lâ saw Mawrah liata achuna asah chaipa liata HOD taihta a kaw châ phapa eima hneipazy ly âchhih zie nata, Marapa saw nata eima District châta hmo lychhih kawpa a châ zie nata palyupalih tlâh a châzie zy reih ta(Dr. K. Robin he atahma Human Resources and Development Centre liata Associate Professor cum Deputy Director a châ ngahaipa a châ hra,thlai ta Professor lâ a kiah heih awpata pahnopa a châ), he khai tawhta alykheina Ryuchâ hlâna LS. K. Ngôrili(Nunu) IMBA 6th semester, ta hnei ta. 

He khai tawhta biereina hnei awpata Sir Dr. K. Robin hruapa a châ. Dr. K. Robin ta pasyuna bie nata alyna bie reinazy, Marapa sawzy khizaw liata alâ papua awpata thaina nata sona achuna kyh liata he hlâta tiama papua via abyuh zie zy, a theina hawhta Mara sawzy deichhyta baokhâ awpa achhuah zie nata akhoh zie zy a reih. He khai tawhtana heta St. LC. Kodei M.Sc(Physics) 4th semester, St. M. Rosangkima M.Sc(EVS) 4th semester nata St. N. Lalpianpuia zy ta biereina ama hnei hra.

Achhâ chaina liata biereina chyupa nata alybie reina Puhpa BN Angel Khailochhô MA(Phil), M.Ed 2nd semester ta hnei ta he khai tawhta Pihnô Caroline Hlychho(O hneituhpa) ta thlahchhâna ta daihti pachhâpa a châ.

Zâhnia ta alykheina programme chyupa ahmâna liata ahlaopa zydua nata tovyu ahneipazy St. William Carrie M.Sc(Biotechnology)4th semester nata Ls. Catherine, B.Tech 6th semester zy chô lia nata sie-vaw na adaihleina vâta pasai kawpata ama hluahtheipa nata petrol chhaota miah tôh ta miah pahlie tuhpa,Ls. Ephesi Hlychho, MSW-4th semester achuhaipa nata St. S. Beichhuasia, BA, M.Ed 2nd Semester a chuhaipazy cho liata Abeipa mohta alyna bie eima reih hmeiseih.

Courtesy - SIAHA DISTRICT : MIZORAM UNIVERSITY CAMPUS*

i/c Representatives.