Kyhpachâna Hmeiseihpa : A vâ-ianô cha Car apiepasipa vâta a hmi motlâh châ khao lei awpa ta a rao khai ha! Ahnei khoh khao vâ tlyma?

Kyhpachâna sâhmia hnazô hmeiseihpa la chôpho khochhihna nata pawngiana he vaw châ vei, tahpa cha he chyhsa paw hro tawhna heta eima pahno thei aw. A khonô/vâ-ianô hnazô/hmi cha chyhsapa hmi chhao lyu lei ngâna taihta raokei khai ha ta, heta mopa chhaota khochhihna nata pawngiana rai a hnazô liana chata â bai khao vei. A khonô hmi cha cha tlupo ta chhiehrupa hmahta châ hrasala, nohchareihta kyhpachâ via rili ta, a tlaichhai via rili ha tlô!

Kheita cha hawh tluta hnazô chhiepa laihsa cha hrukhei thei thlâh hapa ma a châ ha tly?

He chapaw, Jayaprakash P., Jai tahpa ta ama aw tyhpa he, India satlia, pôraoh nata sâhmia lia chhaota zakhei a chhih leipa, satlia a tlai kawpa he châ ta. Chanô chhithai kawpa nata khochhih kawpa, Sunitha Nair, nahta ama High School kiana liata amâ vaw tyh.

Jai chata amâ tyh tuana dâh cha hetana heta reihpa ta, “Khâpa vâta ma ano cha ei sai ngâthlâh ha tly tahpa chhao â pahnothai khao vana,” tahpa ta Sunitha a hmô tua chaina cha reihpapua ta. “Class vaw hawh ta. A zâ ngia ta, â tyuna ngaipa ta â tyuh ta. A dyuchhai liata â zâ tyu nona taih chata ei tawpâ thlâh ha. A mylâ my eimâ hmô heihpa cha, ano palie ta bie einâ vaw chho.’”a ta.

Amâ pakyh tua chai no tawhta ti nata nga hawhta khâchâ â pazaopâ ha ei ta. Viasa pha kawpa ama châ pâ ha hra. Sunitha chata, “Eimâ chuna rei khoh pi ta, lâchao bawh khoh pi ta, hmoto eima tao khoh, keima chô liata a palôhphaozie deita cha na ei pahno leipa a châ ha bâ,” tahpa ta ama likah liata kyhpachâna avaw pi pathaona dâh a rei.

Ama Graduate tawhna chata, kô khazie leichâ ma cha bie a chho khao leipa ta y ei ta, châhrasala Hiahvâ sâhmia patipatyhpa, chôhsu awpa tar y a rao hapa ma ama châ ha tly, Social Media liata amâ hmô ha heih. Sunitha ta a pihna Noh (Birthday) liata Jai cha bie avaw chho heih ta, cha tawhna rakha chata ama likah kyhpachâna cha nyu thai muarua khao lei awpa ta paw hawhta â vaw pakai hapa a châ.

Nohkha cha Sunitha cha Car ta O lâ â dina liata vâduana a tyhpa ta, â piepasi haw. Lâthlôh liata a car cha ahluahpa ta â paliepathei chaimâh ta. A Car chhikao tawhna chata Sunitha cha Car a hluahpa tha chata pazawpapua ta, cha hawhta Car â hluah ngâpa hryta chhikao tawhta a pazaw papuana lâ liana chata a hmia cha lâthlôh châpa liata a rôhkhyh chaimâh ta, a hmia pua a rao khai haw. A pôhpa deikua â boh.

Sunitha â piepasipa thâtih chata Jai kô thlai tlôpa ta, thohna-O lâ â râ pâ lymâ ha hra. Thohna-O kei tlô ta, a kyhpachâ chaipa Sunitha hmia a kei hmôpa cha, a mo tawhta mothlih za lohpapuapa cha pakhâ thei rimâ awpa châ vei, athata cha ta, Sunitha châta cha Jai kyhpachâna cha chakhei leithei awpa châ tlai hra aw vei.

Jai cha thohna-O tawhta â di tawhna chata Sunitha kyh a pachânazie cha pachâpazi lymâ ta. Cha zâ cha a mô leipa ta, Sunitha a pachâna nata ngiachhiena chata zâ daihti khazie leichâ ma a môzia leipa ta a pakhôsa. Jai châta cha chanô khochhihpa nata chhithai kawpa kyh a pachâ tyhpa, Sunitha kha a mothlaw nata pachâna liata lai chai leithei aw vei.

Jai chata, Sunitha apiepasina vâta a hmi motlâh chhao a y khao leipa, “A chô liata ei palôh phaozie a nano beih vei. Keima châta Khazohpa ta chanô eina piepa a châ tahpa khâchâ ei pahno. Khâpa hropa hmahta ei kyhpachâna pakhâ thei aw vei. A mylâ chata thohna-O lâ vaw heihpa ta, a hnei awpa ei hrua hapa a châ,” a ta.

A mylâ ta Thohna-O liata Sunitha a kei tlyna liata, ahnei awpa hruapâ ha ta. Sunitha cha â pahlaw tu hapa vâta nata Jai chata sai khiahma a so, a tahpa vâta athata a pahneihpâ ngâkaw.

Jai chata ahnei awpa ta a hrua no ta a yna dâh hetana heta reih ta, “Ahnei si’ tah na ta, ‘Kyh ei cha pachâ.’ Ei tahpâ hra” a ta.

Sunitha chata Jai cha saiso vei tahpa pahno ta, a hruana cha â pyhpâ ha hra.

Sunitha thohna-O tawhta a pua tawhna chata, Jai chata ama O lâ kei tly ta. “My dawh 3 paro ha ta, ama O chô atyuna liata eina vaw hâ thlâh ha” tahpa ta, “Ano châta Rosepawpi ei cheipa cha piepa ta, a mokhaoh liata mohpa ta, ‘Ahnei bâ sih y’ ei tah hapa a châ” a ta.

Sunitha chata, “Thlaita chyh-eihpa ta, ahruana cha apyhpâ ha na ta, kha daihti liana khata cha khizaw liata chanô âly chaipa ei châ thlyu aw.”a tah hra.

Atahmâ cha Jai nata Sunitha zy he nôvah khochhih kawpa nata adyhryh kawpa châ ha ei ta, ama likah liata sawchanô khochhih kawpa, Atmia, hneipa ta lôhki kawpa ta ama y khoh ha bâ. Ama sawchanô moh, ‘ATMIA’ tahpa he “Ei thlahpa (my soul).”tahna a châ.