Article : Ei Wikipedia & Ei Lyna bieru – By Daolai Azyu

Daolai Azyu

Khizaw thaina nata sona a sâh lymâ ta, cha hawh pyly ta hrozie zy chhao â nano lymâ. Khahlâ ta satlia nata laihsa zy cha bie achhopahliena (communication) phapa a y mâh leipa vâta châ (letter) amâ paphao tyh. Atlâhpipa ta châti rohpahâh (pen ti roh pahâhpa) ta amâ paphao na ta cha yzie hnei kaw ta. A yzie cha ama likah ziza a pha kaw tahna châta, Châti saihpa (Red)-pa ta amâ paphao na ta cha hmo khochhih lei kawpa pamosa n'awpa ta ama hmâ tyh. Chata khizaw a kaw sosâh lymâ ta, Satlia nata laihsa hro hmâna dâh zy chhao â kaw thla lymâ.

Khahlâ ta satlia nata laihsa zy cha a pathaih kawpa ta a charei tyh ei ta, Tikhaoh lâ zy laihsanah ti chalopa awpa ta satlianahzy cha a thao chhiechhu tyh ei ta; ama tha zy a pawh kaw tyh. Anodeikua cha atahmâhlâ satlia nata laihsa zy eima hro hmâna dâh nata eimâ chareina dâh zy cha khahlâ daihti nahta cha athata â nano ha ta, Tikhaoh lâ ta laihsa ti chalopa hlâta cha a zo/avâ ta su dâhthlohna lâta charei/charâpa cha eimâ tlyh via ha bâ. Thyutlianah maochhie thai’pa châ vei ei - Khizaw ta â chakaihpa châ ha tlôh ta. Anodeikua cha khizaw ta a chakaih hra sala, patlôsatuhpa nata patlôsa leituhpa cha keimo sasyh ku liata â pahnieh. Eima mahnô/mahpaw daihti nota veiseihna kha khizaw ‘technology’ a sâh lymâpa chata athata pahleipahlô pathao ha ta; A pachaihpa ta pha noh hlâta chhie noh liata eima zyu â lâ kaw bâ. Apachaihpa ta keima mopakha ei zâ tlychaka khoh chaipa cha THISAIH piena kyh he a châ.

Umm...khita khi biehmia cha vaw tlâ avaw daih chy sa la. Kô 26 ta uhtheipa Chapaw châ na ta, unawh liata uhthei chaipa, nô nata paw ta ama mothai chaipa, ei mohhchhiepa chhaota aw ama pasaih beih leipa, “Daodao” tahpa sai ta ama aw tyhpa kha châ hra na ta. Khizaw athata ei tôh (paphasana lâta reina sy) tyh hra. Kei he chapaw hro zy hawhta hrozie pha kawpa châ leipa na ta; Anodeikua cha Abeipa, alei liata eima vaw pih hlâ tawhta maniah pahnopasiatuhpa nata eima hmialâ daihti zydua a pahnotuhpa chata kyh na pachâ tu ha ta, Nô nata Paw pha kawpa na pie ta aly lei thai’pa châ va na. Keima paw he Sawhkhâ rai a hria leipa châ ta, ei mahpaw hniehnôh khâchâ pazi ta (ei mahpaw he râh chhihtuhpa parohpa Ex-MDC vaw châ ha hra ta, a daihti hluh viapa cha pachutuhpa/teacher nata râh châta keih vaw chakâ tyh hrapa a châ. Kô 2002 liana khata maniah â pahâsai ha). Chata cha keima paw cha ei mahpaw hniehnôh pazipâna chô chata vaih nata tlâh châta a theina rakha ta keih a chakâ tyh hra.

Paw satlia kaw chypa a châpa vâna chata a sawchapaw hnei chhôhpa cha a theina rakha ta na mohôh ta, chapaw pakha dei tah leipa ta, hmoto na pachu ta, chanô rai ta eima pachâ tyhpa taihta thai leipa hnei na; anodeikua la sâh chaneipa deikua la thai tlai na. Chata satliana daihti cha kaw hmâh pathao lymâ na ta. Hmo sâkha rei awpa ei my tlamaw aw tahpa ei chi kaw tyhpa cha, keima nô nata keima paw ta maniah mohôhna nata sawnah châta thlah ama chhâna he my pasaih beih na. Achhâpa cha keima nô cha pachutuhpa (teacher) tlâ châ ta, keima paw he sawhkhâ raihriana hnei vei - MTP he a rai tlâ a châ. Anodeikuala keimapaw ta ‘devotion’ liata a rei tyhpa sâkha la, “Sawnawh saih u, keimo la chyhsa hropazy hawhta eima khihsazy pha ngyu vei, nama khopa chhao cha taopa thei tyh ma pi; Anodeikuala pachâ pasia tu u! nama unawh ta thohna O (hospital) liata ama admit pâ ngâkawna taihta nama pasa beih ma? Oxygen pie ngâna taihta nama pasa beih ma? tahpa he pachâ teh u. He zydua he kei, nama paw hlao hnei leipa ta vaih nata tlâh châta ei theina rakha ta kei ei vaw chakâna theilâpa a châ hiH” a tah tyh,

Kha a bie reipa kha atahmâ na ei vaw pahnothai. Mohropa saw zy hawhta sia paki hra leipa sa la, nô nata paw ta Taotuhpa (Abeipa) lâta ama thlahchhâna zawzi chata ei hro noh daihti cha kaw pazao hualua na ta, Âdâh hawh tlaita ei kâru lei hapa cha ei kaw hmô ha hra.

Ummm....a seih tu lei n'awpa ta vaw chakâ lymâ na ta. Ei hrona dadieh kawpa nata reipasaona chhao tiah theileipa cha thua (steel) ta pakypa hawh tlai ta avaw chha pathao ha ta, Nô nata paw kyhpachâna cha rei lei, satlia nata laihsa kyhpachâna chhao pahnopasia leipa ta daihti ei vaw hmâh tyhpa cha pahnosapa ta y ha na ta, Ei tao beih leipa zy cha vaw tao pathao na ta, ei tao tyhpa (hmo phaleipa) zy cha ei siesai pathao ha.

Kô 2 hlei eimâ kaw pazi ha tawhta cha daihti lychhih kawpa zy hmâh khoh tyh pi ta (umm...ei kyhpachâpa he keima hlâta uhthei viapa a châpa vâta satlia nata laihsa y khohna dâh pathaih kawpa na pachutuhpa châ ta, a châhta cha a phih leipa ta chapaw châ hra na ta, ei nô-uh kawna daihti zy a y hôlô hra). Hrozie nôchâ hluhpi na pachu ta, hawti viapa hmah châ hra sala, na chi za thai kaw ta, ei palai kaw tyh.

Kô 2018 kô a kaw ngia ha pi ta, khizaw satlia nata laihsa zy ta ama hâdy chaipa, ‘Valentine’s Day 14 February’ a châ. Keima chhao ta hâdy kaw bâ na ta, noh nata daihti cha sie para sa la ei tah ngaita  kaw.

Cha hawhta ei ngiatiah lei kawpa noh, February noh 14 cha eimâ kaw ngia haw. Ei palôhru ta ‘Noh eima hmâ n'awpa däh zy cha patuapalua/plan tao chhielie na ta, ei tha a pawh kaw.

Ei pangiasapa hawh tlaita ‘phone call' cha ei dao ha hra. Sitting room tawhna chata a chatliepâ kawpa ta phone cha za la na ta, anodeikua la ei bie theipa chata ei châh-ao a hria ngaita kaw. Cha cha khâ hropa châ leipa ta, “THISAI DONATE” tahpa reikah cha a châ.

Mohropazy châta byhnâ châpa a pha zie he “Keidao” ta athata na chho tyh ta, kei chhaota athata ei reikhei tyh hra; anodeikuala THISAIH PIE awpa chôchâh he la rei khoh tyh hra ei sihla ei palôhrupa lia deikua ei support lei kaw. Khazia eima tah khiahta la, khizaw liata ei chi chaipa cha Sâtâ hlâ chhaota  SYRINGE (thisai lana awpa ta chhiephoh ama hmâ tyhpa) he a châ. Chapawsaw, khonô kiahpâh liata chakeih pakah chhao chapao ngâh’pa ei tah hra tawhta cha tao lei thai’pa chà khao vei!

Umm...Keidao he chanô so kawpa châ ta, ei ngâhna awpa ta “Ladies First” tahpa ta hmiah â sah ha ta, kei chhao cha Abeipa lâta ei thlahpazy liahsa pavaosana chôta ei chi chaipa THISAIH cha a eikha n'awpa ta ei pie ha hra! Keidao hawhta kyhpachâtuh dopa he atyh khao va na .

              

Achhâna châta, ei vaw rei khoh kawpa la, ei bie vaw rohpa zydua liana khita ei moh a papha khohpa vâta vaw rohpa châ leipa na ta; anodeikua la ei nô nata paw, nata ei kyhpachâpa (Khonô) zy nata eima daihti vaw hmâh chiehpa liata amopâtlâh a châ viapa thokha, Mara thyutlia zy a phana lâta eima hmâ hra thei n'awpa ta ei vaw chapai chakhyh hrapa a châ. Chanô/Chapaw kyhpachâna liata a phana lâta eima hro eima hmâ thei hra n'awpa châta ei thâtih chyhta ei vaw chapaipa hrapa a châ.

                Mohropazy châta byhnâ châ hra awpa ta, na keih vaw chakâ lymâ ma y. Eima Bible liata, "Pie u la, Piepa ta nama y aw" tahpa kha a dâhdeipa na a châ; A pahnopasiatuhpa hry liata pakha ei châ hrapa vâta ei ly ngaita kaw.