MISS MARA GOSPEL KHITHIE HE PASÂHSA Â CHHIH KAW! - By CL Hranga

Miss Mara 2016 laihsa Gospel Khithie (Gossy) he kô 2016 khata MTP General Conference, Laki khih liata Miss Mara châta atlyh patlohpa châ ta. Ano he Tipa Dairy Vaihpa a châ.

Achuna vâta a daihti hluh via syulyu cha Tipâ khih chhôh lia chhaota maniah ylâh thei leipa ta, achuna tawhta a vaw tlô tlakaihpa lia chhaota a pua-ei beih leipa cha bao hnaihta, khih liata a y nata y lei chhao kei chyhsa nohkhih leipa heta cha vaw pahno tyh leipa na ta. Khih liata a y nata y lei ei pahno thei chaina cha, ‘Chhiena kyh liata a châ via chai’.

Achhâpa cha, Tipâ khih he Mararâh liata khihpi sânona a châpa hawhta, VC-5 nata MTP Branch-3 ta a pachhaihpa a châ.

Anodeikua cha, Mararâh khihpi 2-na tah leipa ta, Chhiena kyh, athipa ama y rai khiahta cha, vaih chaki chhâna liata hawsai a thipa chhao rai châ sala, ama pahnopa nata Daoh zydua ama khaw khai tyh. He heta khahlâ tawhta, uhthei viapa nata nôpawnah zy ta khih ama vaw mohôhna a pha ngâsâ tahpa a palâsa ngâsâ. Cha dei châ vei, athihpa ri a y nota Awnanopa apakhyna dawh parosa vei ei.

Cha dei châ leipa ta, athipa ri khih padeikheina kyh liata VC Area nata MTP Area ta yzie pahneisa vei ei. Satlia nata laihsa zydua ama puakhai rô tyh cha maw!

Cha hry liata chyhsa pakha cha, mohropa châ vei ei, eima Miss Mara Gospel Khithie tlai hena a châ.

Achhâpa cha, khih liata a y nota, athihpa ama y rai khiahta cha khih a padei lymâ cha maw!

Atahmâhlâ ta eima laihsanahta, "Khihpadei la, ei sapa ta na a pahnie vei. Cha thota, ei hmiathiana a pôh thai tu ha", tahpa reikah ei thei tyh.

Gospel Khithie (Gossy) deikua la, khihpadeipa vâta a hmiathia pôh ta, a hmichhie awpa a papeisa vei. Athihpa ama y rai khiahta cha khih a padei lymâ.

Cha dei châ vei. MTP ta zâ 3 yru amâ tyukhei tyhna liata hla beih hra vei. Achhâna a tlô lymâ tyh. Yrupanah O phituhpa hry liata â hlao lymâ tyh cha maw!

Zâkha chhochhi cha, "Eima Mara Miss tlaita O nama paphisa tyhpa hela a su tlai vei" ei tah pâ. Anodeikua âmo ta ama paphisapa cha leipa ta, ano ta la a phi lymâ ha tyh!!!.

He vâna tlai heta la y, ano thei vei hâh sai cha,  “âlâhâh kawpa ta apalaikhei na ta, aru lâta ei pasâhsa ngâsâ”!

“MISS  MARA GOSPEL KHITHIE, MARASAWZY CHÂTA BYHNÂ CHÂ LYMÂ MA Y”