Sri Lanka Bomb-papa liata athipa zie cha 359 tloh ha ei ta; chyhsa 58 patupa ama châ ha hra

Târi 21.4.2019 (Easter Sunday) nohta Sri Lanka liata Bomb-papa vâta a thipa zie cha chyhsa 359 tloh ha ei ta, atanoh Pakhy Nohta he Bomb-papa nahta ahniahnipa liata chyhsa hropa ama patu chhi ha heih.

Muslim riahrupa py ‘Islamic State’ chata âmo ta ama taopa, tahpa ama phuah raohpa ta, he bomb-papatuhpa chyhsa 7 zy chhao palâsapa ta, Achhyna-O nata Hotel liata Bomb-papa zy cha ‘Suicide Bomber’ zy taopa a châ, ama tah hra.

Sri Lanka sawhkhâ chata ama râh liata Bomb-papa he New Zealand liata krizyhpa chyhsa pakha ta Muslim achhyna-O MOSQUE Meithei ta tlahnaopa ta, chyhsa 40 hlei a kasaopa phuhlana hawhta reihpa ta, Sri Lanka Prime Minister Ranil Wickremesinghe chata he peihriatuhpazy he râh hropa lâta riahrupa pyzy nahta ahniahnina ama hnei ma, tahpa amâ laichadai hai, a ta.

Police biephuahtuhpa Ruwan Gunasekara chata bomb-papa kyh nahta ahniahnipa liata chyhsa 18 patu chhipa ama châ, tahpa ta, hetana heta chyhsa 58 zy cha Bomb-papa nahta ahniahnipa liata ama patu ha, tahna a châ.

He Bomb-papa he âmo taopa hawhta a reihtuhpa, ‘Islamic State’ zy heta Iraq nata Syria liata amâ vaopa su zydua USA nata ahrialâhpazy ta chhu pakhua khai ha ei ta, atahmâ duasu liata khataihlia ma supipa ama hnei, tahpa cha pahnopa châ mâh vei.