Arsenal Player parohpa Jose Antonio Reyes a thi!

Arsenal winger parohpa, Jose Antonio Reyes cha kô 35 deita uhtheipa châpa ta ahluahtheipa apiepasina liata a thi, tahpa Spanish club Sevilla chata atanoh khata ama phuah.

Spain chyhsa, Jose Antonio Reyes heta kô 2004 January thlâpâ khata Sevilla tawhta Gunners a pazao ta. Premier League 2003-2004 Season liana chhochhi khata, ano sahlaota Arsenal khata pahnie leipa hnei leipa ta nyungiapa ama chalopa kha a châ.

He khai tawhna heta Real Madrid lâ loan ta kô 2006-07, khata pua ta, La Liga nyungiapa a kei chalo heih.

A laiseihna Club Sevilla chata ama izie reihpa ta, "Sevilla club thâtih liata ama club tawhta laiseihpa hryta Player sôh chaipa pakha" tahpa ta ama pathlie.

Reyes heta a lahpinô Noelia Lopez, June 2017 liata ahneipa, nata saw pathôh, chanô pano - Noelia nata Triana zy nata a sawchapaw Jose Antonio Jr zy a siesai.

Reyes ama zana palâsana châta atazâ Champions League final liata minute sâkha daihti hmãpa a châ aw. Reyes he Spaniard player hryta Premier League nyungiapa chalo tua chaipa a châ.

Arsenal Player rônahpa Thiery Henry nata, Football khizaw liata chyhsa nano nanopazy ta ama izie ama reihpapua.

Sevilla, Arsenal Espanyol, Cordoba nata Chinese club Xinjiang Tianshan Leopard, châta â khaih tawhta Spanish second division club Extremadura cha January 2019 khata â pazao ta, a thi noh taihta he club châ heta â khaih.

Report thokha ta ama palâsana liata cha - Reyes heta Sevilla liata a puhpa a châ tyhpa, atahmâ ta Arsenal Coach a chãpa Unai Emery, ry liata hria awpa hawhta reipa a châ. I â chhih kaw na!