Mizoram liata African Swine Fever Vao pasana hri charei thei awpa duasu liata a duah

Aizawl: Atliata China nata nochhi lâ râh thokha liata vao pasana hri charei haipa, African Swine Fever cha Mizoram liata chhao a charei thlâh ha thei hranazie AH & Vety department, Mizoram liata hriatuhpazy ta ama reipa hawhta Zalen thâtihbu chata a palâsa.

Image source : Zalen

Vety liata athaisopazy ta ama reina dâh ta, African Swine Fever he PRRS nahta â vaw lâ papuana dâh â lyu kaw ta, Laboratory liata pakhâta ta achupasiapa a châ leipa ta a châ chhochhi khiahta cha pahno pahlao a nao kaw, ama ta. PRRS pasana a hneipa vao cha ama zydua ta thi cheingei hlei leipa ei ta, African Swine Fever pasana a hneipa vao zy deikua he cha zakha liata zakha (100%) ama thi tyhpa vâta chi â chhih kaw, ama ta.

ASF pasana vâna heta China sawhkhâ chata vao hluhpi vaw thie ha ta, he pasana he nochhi râh thokha - Laos, Malayasia nata râh hropazy liata avaw charei hapa vâta a pazipa liata cha India opa Myanmar a châpa vâta nata vaccine a y leipa vâta asohsi â ngiah kaw, tah ei ta. Zawpizy he pasana tawhtapa vao zy amâ boh thei n’awpa ta nochhi lâ tawhta vao la lei awpa ta amâ haw hra. 

AH & Vety hriatuhpazy chata ASF pasana a hneipa vao he cha chyhsapa châta chi a chhih taraw leipa ta; châhrasala, he pasana a hnei hapa vao cha zakha liata zakha ama thi chhyh hapa vâta a hri a charei tlai khiahta cha a pei pasih kaw thei, ama ta.

- Zalen