University phapa atlyhna liata Mizoram University 21-na

Aizawl: National Institutional Ranking Framework (NIRF) zy ta kôchareihta ama tao tyhpa hawhta India râh liata university phapa ama thliena/panuana thieh chaipa liata Mizoram University chata 21-na duasu kaw to ta. Achuna tyhpa kyh liata achuna su phapa amâ tlyhpa-eihpa liana heta university 36 atlyhpapuapa châ ta, Jawaharlal Nehru University (JNU), New Delhi cha 1-na a châ. MZU he patent (hneituhpa châna/hmôpapuatuhpa/taopapuatuhpa châna) awpa hmo liata 3-na a châ hra.

University phapa thliena liana heta panuana 7 ypa ta, achuhaipa ama lana dâh nata amâ mohôhna dâh zy, pachuna dâh nata research lâchhâh liata hlaotlohna zy, University yna su nata khihsanazie zy, Achuhaipazy palôhphaozie nata mohôhna dâh zy, Hmialâ daihti châta hlaotlohna kyh liata achhihthana zy nata achuna kawh viapa ama hneikheina dâh zy tawhta thliepa châ ta, Objective score nata Perception score ama so pasâh kaw.

Mizoram University-liata achu awpa ama lana dâh cha a pha thlâh hapa ta a lâ ta, ama pachuna dâh nata Research ama hneikheina dâh deikua a vâtlâhpa hawhta â lâ theina cha, point 250 hmô theina awpa liata point 142.3 hmô ei ta, A su, chhaichhi nata khihsadâh duasu ama thliena liata point 175 ama hmô thei nota point 112.4 ama hmô. 

Personality and leadership development lâchhâh liata deikua kho â khi lei kaw ta, point 150 hmô theina liata Point 63.7 ngâlâh hmô ei ta. Career progression and placement ama tahpa liata chhao â hnai kaw ta, achuhaipazy ta hlaotlohna ama hnei thei n’awpa kyh liata nata achuna kawh viapa ama hnei thei n’awpa kyh liata hmahlana liana heta point 217 hmô theina awpa liata point 89.8 ngâlâh ama hmô.