Papua New Guinea : Chipho apabuana liata chyhsa 24 rarô-y kawpa ta ama thie

PNG (BBC) : Abeipanoh nata Hriatuanoh liata hmo a tlôpa rarô-y kawpa liata - Papua New Guinea râh, Highlands rachhôh liata chipho nata chipho adyuhna/atlahnaona a tlôpa liata chanô nata hawtipazy a hlaopa ta chyhsa 24 hlâta chyh via leipazy cha a rarô-y kawpa ta thiepa ama châ, tahpa BBC chata a palâsa.

Highlans, Hela bia, Papua New Guinea liata chipho likah liata buana a tlôpa vâta a thipazie he Report thokha ta cha 24 hlâta chhao ama hluh via, tahpa palâsa ei ta; a thipazie he ama pôh via na ta pangiasapa a châ hra.

PNG PM James Marape chata he buana a pathaopatôtuhpazy cha alaichadaipa châ aw ei ta, pahnopapuapa ama châ khiahta a pasa thei chaina hawhta hriepa ama châ aw, tahpa ta "He hmo vâna heta ei hrochhôhta ei pachârôh chaina noh ei hmâh hai" a tah hra.

Atahmâ ta chipho nanozy likah liata pehriana a tlôpa he kô hluhpi chhôhta PNG liata he hawhpa hmo a tlôpa liata rarô-y chaipa hrytapa a châ hra.

He hawhta a thietuna he khâpa vâta a tlôpa ma a châ tahpa pahnopa châ mâh leipa ta. Anodeikua PNG liana heta kô 20 hlei chhôh cha Tribal chipho nano nanopazy likah liata athietuna nata buana a vaw tlô ngâthlâh ha tyhpa a châ.

PNG liata news agency EMTV chata Tari-Pori district liata khih miano liata athietuna a tlôpa chôchâh palâsapa ta. A khô hapa Abeipanoh khata Munima khih liata chapaw 4 nata chanô 3 thiepa châ ei ta. He khai tawhta Hriatuanoh khata, hawtipa nata chanô 16 zy cha Karida khih liata thiepa ama châ heih, tahpa EMTV heta palâsa ta. He ama thiepa hryta chanô panozy cha saw phaoh haipa ama châ.

Pills Pimua Kolo, Hela bia liata Department of health liata a hriapa ta Facebook liata Karida khih liata athietuna nohthlahpa a tawhpa liata â lâna dâh ta cha, chyhsa ri, pohta pahlypa, thokô liata ama pangieh thlâh hapazy, â lâ ta. Kolo heta a rei lymâna liata cha, chyhsa thokha ama thiepazy chhochhi cha amâ chadaipadi khai ha, a ta.

He buana tlôna bia zy liana heta Police nata pheisaih thlai tuapâ hapa ama châ hra.