A chatlie thei chaina hawhta Afghanistan eima puasai aw - US President Trump

US President Donald Trump chata Afghanistan tawhta a chatlie thei chaina hawhta US pheisaihzy lapapua awpa amâ chhuah, tahpa ta, “He Afghanistan liata adyuhna liana heta eimâ hlaohli awpa chhao châ taraw vei” a ta.

9/11 World Trade Centre, Al Qaeda riahrupa py ta ama tlahnaopa vâta kô 2001 liata US ta Afghanistan râhchhôh liata a pheisaihzy a tuah pangia rakha tawhna khata, kô 2019 taihta Afghanistan liana heta US pheisaih 2400 ama vaw thi ha. US President Trump sawhkhâ chata Afghanistan tawhta ama pheisaihzy lapapua n’awpa chôchâh liata apatohpatiana vaw siekhei lymâ ei ta, anodeikua ryhpaohna y thei mâh vei. ‘US Special Envoy for Afghanistan Reconciliation’ Zalmay Khalilzad chata atahmâno he Taliban-zy adaoh haipa ta, Afghanistan tawhta US pheisaihzy lapapua n’awpa dâh a reikhei hai ei.