Jammu & Kashmir : India sawhkhâ ta zawpizy a kohki pazao lymâ

NEW DELHI/SRINAGAR: India sawhkhâ ta Jammu & Kashmir mohôhna dâh pananopa ta, India Dâhpipa liata Article 370 phiepa ta, UT sâno lâta tao awpa ta hmah a lana sie lymâpa liata, Srinagar liata zawpi palôhtlâhleipazy nata pheisaihzy likah liata buana biethâh thei awpa a ypa vâta zâhnia Abeipanoh tawhna khata Srinagar, Jammu & Kashmir liata zawpi apôhpakhy pasaileina dâh chaluah ha heihpa châpa ta.

Biehnawh ta a palâsana dâhta cha zâhnia Abeipanoh khata Police-zy ta khihliah tlâh-awhna hmâpa ta zawpizy cha ama O lâ a di awpa ta pahnosapa ta, Daohhneituhpazy chhao ama daoh khaw awpa ta pahnosapa ama châ ha heih hra.

Home Ministry biephuahtuhpa ta a reina dâhta, Pachyhnoh khata Srinagar nata Baramulla su thokha liata zawpi ta palôhtlâhleina ama palâsa, tahpa ta, he liata palôhtlâhleina palâsatuhpazy he chyhsa 20 rachhôh ama châpa hawhta a rei hra.

Home Ministry chata khizaw media hropa BBC-zy ta Kashmir liata chyhsa 10,000 ta palôhtlâhleina ama palâsa tahpa ta ama papuapa cha, ‘taochhyhpa nata Report do leipa’ tahpa ta a dytha.

He hawhta a châ nona heta Jammu & Kashmir CM parohpa pano, Omar Abdullah nata Mehboob Mufti-zy hleikhôta, Politician 400 tlai patupa ama châ hai.