Myanmar : Mon State liata leichopa vâta chyhsa 52 ama thi ha

PAUNG TOWNSHIP, Myanmar— Hâta hmiatuapa Chutyhnoh my dawh 8:00Am-pa liata Myanmar chho lâta, Mon State, Paung Township liata Mottama khih liata leichopa vâta hrona a pahleipazie cha 52 ama tloh ha, tahpa ta sawhkhâ chyhsazy ta ama rei.

He chhiena tlôna su, Tlâh thaby liata a ypa Mottama, Paung Township, Mon State, Myanmar liata pachhapapuana raihriatuhpazy chata chyhsa aleipazy tlua pazao lymâ chy ei ta. He hawhta a châ nona heta, a vâ suapa deikua a pazao lymâ chy hra.

He leichopa heta chyhsa pahrâna O 25 nata ahluahtheipa 5 vi ta.  U Zaw Moe Aung, Paung Township General Administrative officer chata, chyhsa 11 ri cha Abeipanoh my khata leichopa tawhta thaohpapua heihpa châpa ta, hetana heta chyhsa 52 ama thi ha, tahna a châ, a ta.

Biehneituhpazy ta ama reina dâhta cha he chhiena tlô nona heta a su liana heta chyhsa 100 ama ypa ta pahnopa a châ. Atahmâ duasu liata cha chyhsa 40 zy cha ama yna chybia pahnopa châ mâh leipa ta; he hry liana heta Mottama khih chyhsa zy hleikhôta khitlypazy chhao amâ hlaopa hawhta pahnopa a chânazie reipa a châ hra.