Jammu & Kashmir ziza a sâh lymâ – CM parohpa pano ‘House Arrest’ ta sopa ama châ

Jammu & Kashmir ziza a sâh lymâpa liata, National Conference luhpa Omar Abdullah nata PDP luhpa Mehbooba Mufti-zy cha khôtho pua thei awpa ta hraihpa (House Arrest) châ ei ta, Srinagar liata ‘Curfew’ phuahpa a châ hra. He hleikhôna heta ‘Mobile nata internet services’-zy chhao pachhâsa khaipa a châ.

Police biepuapa chata, "J&K Chief Minister parohpa pano Omar Abdullah, Mehbooba Mufti zy cha O puasai thei lei awpa ta kohkipa châ ei ta, Jammu & Kashmir liata riahrupa py tluapapuana nata tlahnaona eima pathao ha awpa vâta he hawhna heta hmahlapa a châ" ama ra.

CM parohpa Omar Abdullah, heta zawpizy cha buana tao leipa ta, a chalih thlâh ha awpa ta bietapa ta, "Kashmir zawpizy hnohta bie ei ta khohpa cha, eima hmialâ daihti heta khâpa ma avaw tlôkhei aw tahpa pahno vei hr’aw sala, khazohpa (allah) heta eima châta hmophapa deita miah â chhuahnoh aw tahpa he khâchâ a ngiapâ na ta, atahmâ bawlaw ta hmô thlyu ma pi, châhrasala â chhuahnazy he eima ngâ awpa a châ, a ta. Kashmir chyhsato hnohta khokheina hlâ na ta, avaw boh ula, buana rai tao khu vy" tahpa ta twitter liata a tawhpapua.

Eima palâsa tyh hapa hawhta, atlia liana khata India sawhkhâ chata Kashmir liana heta India pheisaih 25000 tuah chhi heihpa ta, Jammu & Kashmir ziza athata he heta pasâh ta; chyhsa hluhpi ta J&K State abohna, India Dâhpipa liata Article 35A pahlei awpa achhuahna a ypa vâta he hawhta ziza a kaw y haipa hawhta ama pachâ.