Kashmir ziza â sâh kaw – India sawhkhâ ta Article 35A phie â chhuah ma?

SRINAGAR: Kashmir liata pheisaih 10,000 a palypangia tawhta hâta eikha chhao a khô hlâta India sawhkhâ chata pheisaih 25,000 a palypangia ha heih. Sawhkhâ biehneituhpazy chata Pohbienoh khata pheisaihzy he Kashmir tlô ei ta, Jammu & Kashmir State su nano nanopa liata raiparuahpa ama châ, tahpa ama rei.

India sawhkhâ chata hâta hmiatuapa liana khata Kashmir liata riahrupazy apielyuna avaw dyuhpalie thei awpa ta pheisaih company 100 (Company sâkha liata pheisaih 100 lymâ ama y) tuachhipa ama châ, tahpa vaw reih ha ta. He hawhta sawhkhâ ta Kashmir liata India pheisaihzy a tuah pangiapa he, National Security Advisor Ajit Doval ta Kashmir tlypa ta â vaw lie tawhta bietluna a taopa a châ.

Director General, Jammu and Kashmir Police Dilbag Singh chata hâta hmiatuapa liana khata, Kashmir Maw lâ liata pheisaih ama chyh kaw chypa vâta pheisaih he tua chhi awpa â ngiah, vaw tah ha hrapa kha a châ.

He hawhta Kashmir liata pheisaih amâ ngia lymâpa heta pachâna nano nanopa sapapua hai ta. He chôchâh liana heta Pakhynoh khata, Jammu and Kashmir Governor Satya Pal Malik chata India Dâhpipa liata Article 35A phie achhuahna y vei, a ta. He Article 35A heta Jammu & Kashmir liata state khôtholâ chyhsa châta râh tlyma, O hmo tlyma hnei pasaileina dâh chôchâh palâsa ta, he he phie awpa achhuahna a ypa vâta he hawhta ziza athata a sâhpa hawhta pachâna a lai kaw.

He hawhta a châ nona heta, Hindu zyhna azipazy châta su peimawhpa tlyna, ‘Amarnath Yatra’ chhao târi 4 Thlazoh 2019 taihta pachhâsa chypa a châ hra. He Yatra châna heta Sawhkhâ chata India pheisaih 40,000 rachhôh a tuah hra.

Indian Army chief General Bipin Rawat chhao Srinagar tlôpa ta, pheisaihzy duasu awpa nata ahrohruana lâchhâh a mokhei.

He hawhta Kashmir liata India pheisaih tuah pangiapa ama châ nona heta, Jammu & Kashmir Chief Minister parohpa, Omar Abdullah chata India Prime Minister Narendra Modi a hmôpa ta, J&K atlyhna cha atakô kôchhâna lâ tao awpa ta ahaw ta. Abdullah, raohpa heta National Conference tawhta chhihtuhpa Farooq Abdullah, Omar paw a hlaopa ta, PM a hmô ei ta, Kashmir ziza pha lei kaw chiehpa cha pasahsa via lei awpa ta amâ haw hra.