No-âhchhihpa : The Pollock Twins - Pihchaneina (Reincarnation) he a y thei hmeiseih ma?

Chyhsapa he ama thi tawhta ama pih chanei thei ma? Pih chaneina (Rebirth) he na zo ma? Hmo y theipa châ sala na pangiasa ma?

Atahmâ ta ama thâtih eima rei awpa he, chyhsapa he ama pih chanei thei, tahpa a eichhiana athata pa-ysatuhpa nata, atanoh taihta athaisopa hluhpi ta ama chhopasia thei leipa, hmo no-âhchhihpa ama tahpa hryta khâ a hlao hrapa a châ.

Kô 1957 May Thlâpâ Abeipanoh my liana khata John Pollock, nata a lahpinô Florence Pollock, Hexham, England liata a pahrâpazy cha ama sawchanô 2 – Jacqueline, kô 6 nata Joanna kô 11-pazy chhaota Apakhy awpa ta Achhyna-O ama ngai nota, vâduana rarô-y kawpa a tyhpa ta, ama sawchanô panopazy cha ahluahtheipa ta a chariehsao ha ei. He vâduana liana heta John Pollock sawchanô pano hleikhôta, chanô hawti hropa pakha chhao ahluahtheipa heta a chariehsao hra.

He hawhta vâduana rarô-y kawpa a tyhpa ta, mâchhiesana mothlih chhaota ama sawchanô kyhpachâ ngaitapa panozy ama pathlie tawhna heta, a kô heihpa, kô 1958, Octorber noh 4-pa liana chata sawchanô Maphie, alyu kawpa – Gillian nata Jennifer Pollock hnei heihpa ta, he maphie zy vâna heta ama mâchhiesana nata pachârôhnazy chhao cha alyna lâta pachâsapa châpa ta, ama paw, ‘John Pollock’ ta chhochhi cha, he maphiehzy he ama uhta pano, ahluahtheipa ta a chariehsao hapazy kha, ama vaw pih chanei ha heih, tahpa ta a rei tyh. He ama paw, John Pollock ta he hawhta reikah a pathliepa he, no-âhchhih kawpa ta he maphiehzy heta ama hro liata ama kaw palâsa lymâ ha hra. Anodeikua, ama nô Florence Pollock deikua ta cha ‘Pih chaneina’ tahpa lâchhâh he zo bohbi vei.

Noh nata daihti vaw sie lymâ ta, maphieh, Gillian nata Jennifer-zy cha kaw laiseih lymâ hrapa ta, bierei ama kaw thai pathao ha hra. He bierei ama kaw thai pathao rakha tawhna heta hmo no-âhchhih kawpa Pollock chhôhkha heta amâ kaw tyh pathao hapa a châ.

He maphieh zy heta maitanô (Toys) amâ kaw hria thai pathao tawhta, ama uhta pano, a thi hapazy ta amâ vaw hria tyhpa, maitanô zy tlai cha ama kaw haw pathao haw. No-âh a chhih kawpa cha, he maitanô zy he, he mahphiehpazy ama pie hlâ syulyu, ama uhta panopazy ama thi hlâ syulyuna khata pasopanô khai ha ei ta, hawsaihpa châta cha pahno awpa chi chhao châ vei. Châhrasala, he maphieh panopazy heta khâchâ hawpa ta, ama uhta panopazy maitanô cha amâ hria khoh pachaih tyh.

He hmo hlâta no-âhchhih via heihpa vaw tlô heihpa ta, he maphiehpazy ta kô ama tloh hlâna heta ama khih, HEXHAM cha puasaipa ta, khih hro lâ a pasie ei ta. Maphiehzy kô 4 ama tloh tawhta Hexham he kei tlykhei heih ei ta, he maphiehzy heta ama uhta zy siku kiana zy, ama uhta panopazy ama vaw palao tyhna su zy cha ama rei thei lymâ thlâh ha cha maw!

He dei châ vei, he maphiehzy heta ama uhta panopazy thina dâh nata, ama thi chyta ama yna dâh zy taihta amâ pielyuzie nata ama reikahzy liata ama palâsa pathao lymâ haw. Kô 5 ama kaw tloh tawhta chhochhi cha ama mâ lâta ama uhta panopazy ahluahtheipa ta a chariesaona dâh kha mâ lâta sapa ta, âmo cha Car ta a chariesao hapa hawhta mâ ama sa tyh hra. He hawhta mâ ama sa tyhpa heta nohchhôh lâ taihta pabuapa ta, Car pyu ama thei rai khiahta cha, athata a kaw pahlawpa ta, ‘Chuh! Car ta miah vaw charieh haw chuh” tahpa ta athata ama kaw sâh tyh.

He maphieh panopazy ydâh liata no-âh a chhih chaipa nata, ama nô nata paw châta chhaota palôh pahâh a chhih leipa hmo tlô heihpa ta, ama uhta panopazy Car ta a chariesaoh nota ama yna dâh châ sala a ngiapa hawhna tlaita reikah pathliepa ta, ama ypa he a châ thlyu aw – Gillian chata a narônô, Jennifer luh chamaopa ta, “Na mokhaoh tawhta thisaih a vaw pua ngâkaw hih” tahpa ta ama uhta panopazy Car ta a charieh nota ama yna dâh hawhta tlaita ypa ta, reikah ama pathlie tyh cha maw!

Ama nô Florence, pih chaneina a zo bohbi leipa chhao chata, a sawchanô panopazy ta ama uhta panopazy thina dâh nata ama hrozie nôchâh amâ kaw la lymâpa cha chhopasia a ru a tah ngaita kaw hra.

Anodeikua, daihti nata noh vaw sie lymâ ta, he maphiehzy he ama kaw pitloh laih lymâna hawhta, ama uhta panopazy thina dâh nata ydâh ama hro liata a kaw lâ lymâpa cha, dusawta ta a pai lymâ ha hrapa a châ.

Kô 1963 liana kheta, Dr Ian Stevenson, University of Virginia liatapa chata he maphiehpazy thâtih he achupasiapa ta, bietluna a taopa cha, ‘Ama uhta pano, Car ta a chariesaoh hapazy kha ama vaw pih chanei heihpa tlai a châ hih’ a ta. Pih chaneina he a vaw y hmeiseih rai khiah maw tahpa cha hiahrihna achhy ru kawpa a châ ha bâ.

Source - Readers' Digest