“Phusâ pie awpa hnei va na; Ngiachhiepa ta he he baona châta na kei piepa kaw muh vy”

Eima pahrâna leilô liata nohkhih ytuzie vâta zy, hmo nano nanopa vâtazy ta chhiena a vaw tlôna daihti liana heta, chyhsapa châna liata chyhsapa hmeiseihpa cha palâsapa ta a y tyh, ama vaw tah tyh. Mohropazy ta miah amâ ngiah hmeiseih tlaina tahpa pahnona pathipalôh chata, chyhsapa ta eima pa-ipacha kawpa zyhna zy, khihtlâh liata chyhsapa châna lâ tawhta a mo pananona zy, Politics liata pachâdâh alyuleina zy nata mohropazy nahta eimâ tah thaileina zydua pasopa ta, baona raihria awpa ta keih eima chakâ tyh. He tlai he, chyhsapa eima châna liata hmo pha chaipa, â ngia chaipa cha a vaw châ tyh.

India râh, Kerala State liata athata a vâ suahpa ta tilaipa nata chhiena nano nanopa avaw tlôkheipa vâta rairuna a tlô haipa liata, chyhsapa ta a chyhsaheihpazy châta â hlâ khaina pamosana pha ngâsâpa â vaw luah ha heih.

Kerela liata cha-ypi (Festival) lai chaipa nata rônah chaipa, ‘Onam’ ama tahpa cha thla heihpa liana khita aly awpa ta amâ chhuahnoh hai. He hawhpa daihti liata zawpi ta ama chalei khoh chaipa nata sôhthih lapangiana pha chaipa cha ‘Bâhla tawhta taopa niesisuapa (Chips)’ a châ. Atahmâ hawhpa daihti nona heta lyutaopazy ta ama bâhla zy cha he hawhpa taona châta ama lana daihti a châ hra. Châhrasala vâduachhih kawpa ta nohkhih chhiena vâta amâ hnabeiseihna hawhta khâpa hmahta châ thei khao vei.

He hawhpa duasu liata amâ dua nota lyutaopa pakha thâtih, Thâtihbu chyhsa pakha, MS Anish Kumar, a,a tahpa ta Social Media liata a tawhpapuapa chata chyhsa hluhpi palôh pahnie ta, pazao ta, ama mothlih a pathlasa.

Kumar heta Idukki district chhiena a tlôpa thâtih achupasia ta. He liana heta lyutaopa pakha, Ashokan ama tahpa, Rajakkad, Munnar liata a pahrâpa thâtih chata a palôh a pahnie ngaita kaw.

Ashokan heta vâsuahpa nata tilaipa vâta a bâhla kô a sâh hlei cha pahlei khai ha ta, nôpo pachârôhpa ta â tyuh thlâh ha awpa a lyu kaw. He hawhta duasu chhie kawpa liata â duah thlâh ha nona heta MS Anish Kumar nata a viasanah cha vaw pangaipa ta, Bâhla he vaw cheihpâ ta.

Kumar nata a viasanah hnohna chata, "Ngiachhie ngâsâpa ta he Bâhla he tilaipa nata leichopa vâta rairuna â tyh haipazy achhaina tlâhphia (Relief Camp) liata baona hawhta na kei piepa muh vy. TV liata Malappuram nata Wayanad liata athata vâsuahpa nata tilaipa ta rairuna a tlôkheipa vaw hmô na ta, ei ngia eina chhie tu ha ei; ei palôh a pakeichhei hmeiseih. Phusâ pie awpa hnei va na. Ngiachhie ngâsâpa ta ei pie thei chhôhpa Bâhla he na vaw piepa kaw muh vy," tahpa ta Bâhla a vaw cheipa cha a hlâ ei.