UEFA SUPER CUP 2019 : Liverpool hmiakô liata Chelsea ta pahniena hladyuh ama pathluah thei ma?

Champions League Champion nata EUROPA League Champion-zy ta nyungiapa amâ chhu tyhpa, ‘UEFA Super Cup’ cha atazâ zâcho dawh 12:30Am heta Champions League nyungiapa chalotuhpa Liverpool nata Europa League nyungiapa chalotuhpa Chelsea-zy ta Besiktas Park, Istanbul, Turkey liata amâ chhu aw. He akhaihna he Ten Sports liata Live-pa a châ aw.

Liverpool he English team hryta Super Cup nyungia chalo hnôh chaipa châ ei ta. Kô 2005 liana khata 3-1 ta CSKA Moscow pahniepa ta nyungiapa he vaw chalo ei ta. Kô 2005 rakha tawhna heta cha English team hry tawhta UEFA Super Cup chalo theipa y khao mâh heih vei ei. Atlia tawhta chhochhi khata cha Spanish club sai ta he nyungiapa he amâ dikhei ha bâ.

Kô 14 a khô tawhta deikua he nyungiapa heta England a ngai ha bâ heih aw tahpa sia ta, Premier League Club laipa rairie, Liverpool nata Chelsea liata pakha lilaw ta he nyungiapa he amâ dikhei aw, tahpa a sia ha bâ.

He hawhta a châ nona heta, Liverpool kaovaihtuh phapa, Alisson Becker cha hmah phaohpa vâta a khaih thei leipa aw ta, ano a thlatuh awpa ta sopa Adrian eima hmô heih aw.

Premier League pathao zâ liata Manchester United hmiakô liata 4-0 ta a tlô leipa, Frank Lampard ta Liverpool ta ama kao ama vaw chatôh heih awpa he kheita avaw pakhâ aw? Moh byuh â chhih kaw bâ.

UEFA Super Cup finals ei sarih a khaih hapa liata râh miakha club rairie â vaw su ha ei ta – Spanish club rairie ta ei palih, Italian club rairie ta ei no amâ vaw chhu ha.

Super Cup liata râh miakha club â vaw su hapazy :

1990  Milan v Sampdoria                        Milan won 3-1 on aggregate

1993  Parma v Milan                                 Parma won 2-1 on aggregate

2006  Sevilla v Barcelona                        Sevilla won 3-0

2014  Real Madrid v Sevilla                    Real Madrid won 2-0

2015  Barcelona v Sevilla                        Barcelona won 5-4 after extra-time

2016  Real Madrid v Sevilla                    Real Madrid won 3-2 after extra-time

2018  Atletico Madrid v Real Madrid Atletico Madrid won 4-2 after extra-time

Atakô he a ei chariena awpa ta râh miakha club rairie ta he nyungiapa he amâ chhu heih awpa châ ta. Season a khô hapa liata ama hmiakô liata chariah a ypa maih chado leipa ta siepakhô lymâtuhpa nata, English Premier League nyungiapa chalo daihmâtuhpa, Liverpool ta, Club laipa, ama Club player rônahpa a châ tyhpa, Frank Lampard mohôhna ry liata atahmâ Season liata nyungiapa hmiatua chaipa chalo cheingei awpa a chhuah awpa, Chelsea ama hmiachhy aw.

He akhaihna liata ngiatlâh a châ kaw awpa cha, a eikhana awpa ta UEFA Super Cup he chanô Referee mohôhna ry liata akhaihpa châ aw ta - Referee awpa he Stephanie Frappart a châ aw.