Barcelona FC ta Neymar lapangia aw vei ei - Barca Club President

Barcelona President Josep Maria Bartomeu chata, Paris St-Germain forward Neymar cha hâkô 2020 Nawh thlâpâ Player apasiena daihti liata lapangia aw vei ei, a ta.

Spanish club laipa Barcelona heta atakô nopi Player apasiena daihti liana khata ama theina zydua papuapa ta Neymar he Nou Camp lâ lapakhua heih awpa achhuahpa ta tei ei ta; châhrasala ama hlao a tloh leipa kha châ ta.

Barcelona Official TV channel ta amâ pakyhna liata Bartomeu heta, Neymar ama lapangia ma, tahpa ama hiahrihna cha “Atahmâ duasu liata la lapangia ma pi” a ta.

Neymar he kô 2017 khata France club laipa, PSG-ta 222m (£205m) ta Barcelona tawhta lapangia ei ta, kha nona khata khizaw liata Player mâ ru chaipa a châpâpa kha châ ta; anodeikua Barca liata a palôh a tlâh leipa vâta Club a puasai ha heihpa kha a châ.

Hmah a phaoh hoh kawpa vâta akhaihna daihti hnei hluh taraw vei hrasala, Neymar heta PSG châta French Football League liana heta Season 2 chhôhta goal 34 a khô.