Demi Lovato ta a nohthlahpa panano leipa (un-edited) instagram liata tawh papua

Hlasathaipa Demi Lovato chata Instagram liata a nohthlahpa, 'Bikini' â ky nopa, panano leipa (un-edited) tawhpapuapa ta, "a pilâ â zakhei tyhpa cha a ai kaw bâ" tahpa ta, mohropa pachâ ta "pi a ngiapa" ama panuana chhao a ai kaw bâ, a tah hra.

Lovato heta a nohthlahpa he hâta hmiatuapa Chutyhnoh khata tawhpapuapa ta, a nohthlahpa liana heta tipo (pool) liata a duahpa ta, ti azawna viahkao (bikini) â taopa ta, mobaina vyhpa â baipâ hra.

Demi Lovato heta, he a nohthlahpa ry liana heta, bikini â ky notapa nohthlahpa, panano leipa (un-edited) tawhpapuapa cha a chi chaipa châ tyh ta; khahlâ zydua ta cha a nohthlahpa hropa a tawhpapuapazy cha, mohropa pahniena awpa avaw panano (edited) tyh, tahpa a rei hra.

image source : instagram

Lovato chata, "Ei hro liata bo thiehpa kia awpa ei khoh ha bâ. Mohropazy pachâna liata bua khao leipa ta, keima hmeiseihpa, ei châna hmeiseihpa palâsa awpa ei chhuah ha bâ" tahpa ta a ropâ hra.

Lovato heta, "Nama hmiakô liata, ei châna hmeiseihpa zakhei leipa ta, china rai hnei leipa ta, ei pilâ hmeiseihpa, hmo totie vaw chatôh papua ta, hmialâ daihti liata saw zy ei vaw sa thei hrapa ta a châ tita chhaota nâ paphasai beih leituh awpa ei pilâ ei vaw duakhei.", a tah hra.

Lovato he a sabia bie pha kaw hra ta; atahmâhlâ khizaw liata pi a ngia kawpa pasâhsana liata a pizie, thawh kaw hrapa he vaw zakhei kaw tyh hra ta. Social media liata a châna hmeiseih leipa, pananopa (edited) nohthlahpa a vaw tawhpapua tyh. Châhrasala, chyhsapa he, eima châna hmeiseih leipa eimâ duakheipa heta, ahy hmahta dôvei leipa pi ta, keimo pyly eimâ dôvei tyh, tahpa a pahnopasia ha hra.