Euro 2020 Qualifying : Scotland zawpi thlazohna tlôkheituhpa Kevin de Bruyne
Kevin de Bruyne thaina vâta Belgium ta ahrana topa ta, Hriatuazâ
ta Euro 2020 akhaih thei awpa tluana, Euro 2020 Qualifying liata Scotland ama
taochhie.
Manchester City midfielder Kevin de Bruyne heta Romelu Lukaku,
Thomas Vermaelen nata Toby Alderweireld goal khô awpa a taopa hleikhôta, ano ta
Belgium goal palihna a khôpâ hra.
Steve Clarke mohôhna ry liata akhaihpa, Scotland deikua kô 22
chhôh ama vaw hâdypa, Euro liata akhaih thei hra awpa ta hâkô 2020 liata
‘play-off’ deita amâ hnabeiseih thei ha bâ aw.
He pahniena ama topa heta Roberto Martinez mohôhna ry liata
akhaihpa Belgium he Group I hmia asahtuhpa ama châpâ ha tahna a châ.
Hampden liata akhaihna liana heta, FIFA Ranking liata sâkhana,
Belgium heta goal hluh viapa ama khô thei taraw, anodeikua si palih he Scotland
pahniena awpa ta â daih kaw.
Group liata 5-na Scotland heta, Russia cha point 9 ta a pha leipa
ei ta, sâkhana Belgium cha point 12 duata a pha hra vei ei.
Chutyhnoh ta Russia hmiakô liata 2-1 ta ama tlô lei tawhta,
Belgium he ataopathipa ta, Eden Hazard a hlao leipa ta Scotland ama taochhie
kaw. Anodeikua Kevin de Bruyne a y thlâh ha tawhta cha Real Madrid player
Hazard he amâ ngiah muaruapa ta a lâ vei?
Scotland, heta Kenny McLean, Ryan Christie, Robert Snodgrass nata
Matt Phillips-zy cha John McGinn, Ryan Fraser, James Forrest nata Oli McBurnie-zy
vyuhpa ta pangiasa ei ta, akhaihna pathaopa a châ tawhta buakha chhôh cha
Scotland heta hmialâ daihti khaih kawpa a kaw hnei awpa ama lyu kaw. Châhrasala,
Belgium ta ama thaina vaw palâsa hmeiseih ei ta, minute 9 chhôhta goal khana
ama za khôpâ ha. Scotland he ‘Counter attack’ liata a pahnieh awpa a chhuahpa
ta akhaih ei ta. Belgium kao tlahnao awpa amâ chhuah tuna liata ama kao chaby
vaih pha leipa ta, suruapa tao hluh ei ta. He heta amâ bohna awpa a parao
ngaita kaw.
Scotland lâ tawhta Snodgrass ta free kick a za chapiepa cha, Belgium
lâ tawhta Dries Mertens ta vaw lapa ta, chavei lâta vaihtuhpa hnei leipa ta a
duahpa De Bruyne thlai kaw pie ta. Pabuatuhpa nata patypamâtuhpa hnei leipa ta
de Bruyne heta chavei lâ a zâ râkheipa ta, Scotland kao chaby a chaphie pahnie
kaw. A mohmia pasaihpa ta ama Striker Lukaku kei hmôpâ ha ta, thlai kei piepa
ta, Lukaku châta cha goal lâta pachâsapa dei cha a tao awpa a y chhôhpa a châ
ha bâ. Goal lâta a pachâsa ha tlai hra.
Scotland defence chhiezie â
lâpasia kawna cha, minute 23 chhôhta Belgium heta si thôh po ama za khô hmâ ha.
Mertens tawhta De Bruyne phei lia ball za tla ta, De Bruyne ta
Lukaku ta Scotland kaw sao a za chapie thlupa ta daihti a ryupa zie cha second
19 chhôh deita a châ. He akhaihna liana heta Lukaku heta Belgium châta a goal
49-na a khô. Lukaku heta a goal 50-na khô thei awpa ta daihti ryhpaohpa hmô
taraw ta, anodeikua a vâdua ha.
Belgium goal 2-na he goal 1-na â ngia tawhta a ngia hawh muarua
heih vei. De Bruyne pyly avaw luah heihpa ta, a kâ lâ tawhta ball a za
pathluahpa cha Vermaelen ta thadâh kawpa ta avaw khai pangia ha heih. Scotland
defence a chaphie-chadawh khai hapa châta pakhâ hmâna awpa y rimâ vei.
Scotland châta Phillips ta Belgium kaovaihtuhpa Thibaut Courtois hmiachhypa
ta za chapie ta, châhrasala kaovaihtuhpa châta rairuna y vei. Hampden liata
akhaihpa mohtuhpa zawpi palôh pasasa via heih awpa ta Belgium pyly ta gaol ama
za khô ha heih. He goal chhao he pakhâ thei awpa chi la a châ taraw; De Bruyne ta
corner tawhta ball avaw chapiepa tawhta a ngiapa châ ta. Alderweireld cha ano
vaihtuhpa Charlie Mulgrew tawhta a tliehpapuapa ta, a luhta a supangiapa a châ.
Belgium ta si thôh pangia ha ei ta, De Bruyne ta a taopa sai ama
châ. Mohropa khô awpa ei thôh taopa ha ta, ano tlaita a khô bâ hra awpa â ngiah
haw.
Scotland kaovaihtuhpa Marshall ta Mertens nata De Bruyne-zy ta ama
vaw chapiepa vaw pakhâ chho ta, goal a ngia chhi mâh vei.
Euro Qualifying Result hropa :
No comments