MCHP Gen.HQ : Siaha ta ama chanôheihpa châta lâthlôh a chhih

Mararâh liata chanô veiseihpa py lai chaipa, M.CH.P(Mara Chanô Py) Gen.HQ : Siaha chata LALHMINGTHANGA S/o THATCHIA(L), TIALDAWNGILUNG khihpa chô liata biehneituhpazy ta a pasa thei chaina hawhta hriena chaluah awpa ta ahnawna lâthlôh amâ chhih.

VIDEO : 

Lalhmingthanga heta târi 20/9/2019 khata Siaha khihpa chanô pakha cha Lawngtlai tawhta Siaha lâ motor ta kaw kiakheipa ta, lâthlôh liata chanô he sahma nata paritheipa thohna ta â theihlô lei ngãna taihta parisa ta. He chanô atheihlô khao leipa he thluahruapa ta lâthlôh liata paziapa ta, a pôhpa pachiahpazy cha a sihryh kawpa ta hriahrâ ta, mohnao kawpa ta nata sawta sa lei kawpa ta video ta a la. He hawhta a kho â khina taihta â hriahrâ tawhta Siaha lâ vaw phaohpa ta, a zothã ta Siaha khih a ngia chyta liata lâthlôh liata â râsai. 

He hmo a tlô tawhta noh 2/3 khôlâ ta a video lapa pasi a chhih kawpa cha social media nano nanopa liata Lalhmingthanga  heta a hiezawh hapa a châ.

MCHP Gen.HQ heta he hmo ama pahno patawnah heta hmahlapâ lymâ ei ta. He chanô maohphyuh kawpa ta Video ta ama lapa chhôhkhazy asaohiahpa ta, chanô he maoh a phyuh via lymâ awpa china nata arâkhâna châta Press Release nata lâthlôh a chhihpa cha tao mâh leipa châ sala tahpa châ ta. Anodeikua Social media nano nanopa liata he hmo he â hiezawh lymâ hapa vâta pyury hnei leipa ta a vaih kawpa ta ypa cha yzie hnei vei tahpa pahnopa ta, 27/9/2019 khata Press Release taopa ta, atanoh Hriatuanoh khata lâthlôh amâ chhih hapa a chã.

Lâthlôh a chhihpa zawpi hluh kaw ei ta. Lâthlôh achhihna liata ama tlâh-awhna bie alãluah viapazy cha :-

1)Siaha khichhai moleipa Lalhmingthanga, Tualdawngilung khih, chanô zy zachhihna paraotuhpa he: Hrochhôhta Jail-liata a tâh mawh sy.

2)Lalhmingthanga, Thatchia(L) sawchapaw, Tialdawngilung khihpa chô liana heta : Ryureina dopa eima khoh.

3) Lalhmingthanga chô liata hriena chaluahna dãh liata :

Sawhkhâ thatlô nata tlô lei â hno aw.

4) Lalhmingthanga, Tialdawngilung khihpa he: Mararâh ta khoh ma pi.

Lâthlôh Bazar Traffic Point tawhta New Siaha Bazar taihta achhihpa chã ta. Lâthlôh achhih patjaona Bazar Traffic Point-liata Pihnô K.Pari, Adviser ta thlahchhâpa ta, Pihnô P.Chaki, President, MCHP(H) ta biereimna hnei ta. Lâthlôh achhih chhâna New Siaha Bazar-liata Pihnô.P.Chaki ta biereina hneipa ta, Pihnô A. Zoramthangi ta thlahchhâna hneipa ta, daihti pachhâsapa a châ.

Atanoh lâthlôh achhihna liana heta Poster nata Placard zy taopa ta, Lalhmingthanga chô liata a pasa thei chaina hawhta hriena chaluah awpa ta sawhkhâ ã hnawna zy, LADC ta Forest guard rai tawhta pabâ awpa ta ahnawna nata maochhiena vâro tlai ama palâsa.

ISSUED BY:MARA CHANÔ PY,

GEN.HQ

SIAHA DISTRICT:SIAHA