Pachyhzâ EPL : Liverpool ama tlô nota Norwich hmiakô liata champion haMan City ama pao!

Norwich striker Teemu Pukki heta atahmâ Season liata ei 4 âkhaihna liata goal 6 khô ha ta; mohropa khô awpa ei 2 a taopa (assist) ha hra.

Champion haipa Manchester City cha pangiasa pha leipa lâ tawhta Norwich City ta pahlaw ei ta; Liverpool deikua atahmâ Season Premier League liata 100% pahniena ama tona akhaihna châ awpa ta Newcastle United pahniepa ta, EPL Point table chô chai liata y pazao lymâpa ta, point 5 ta âmo pazituhpa amâ râsai via ha heih.

Champion haipa Manchester City nata Norwich City akhaihna liana heta, Kenny McLean goal hmâpa ta Norwich heta hmia a sah ei ta, he he Todd Cantwell ta za khô chhipa ta, pangiasa leipa pi ta 2-0 ta hmia amâ sah. 1st Half a chhâ hlâta Manchester City châta Sergio Aguero ta goal kha za khô ta; 2nd half liata Norwich City heta atahmâ Season liata goal 6 a khô hapa, striker Teemu Pukki goal hmâpa ta a zâ chhypalie heih ei ta. Rodri ta Man City châta si kha hropa za khô heih taraw hrasala, Canaries (Norwich) heta ama kao pabohsa lymâpa ta, 3-2 ta pahniena ama to hapa a châ.

1st Half chhôhta Sadio Mane ta goal 2 a khôpa hmâpa ta Liverpool ta Newcastle United châta Jetro Willems ta goal a khôpa achhypaliepa ta, ama tlyliah Anfield liata Newcastle he 3-1 ta ama vaw pahnie.

1st Half liata Divock Origi ta hmah a phaohpa vâta ano a thla awpa ta Roberto Firmino a zâ ngia ta. Atahmâno ta â pielyuzie a ngia kaw tyhpa nata a khaih pha kaw tyhpa, he Brazilian, Firmino heta Mohamed Salah goal khô awpa a za taopapâ ha heih hra. Liverpool goal 3-na he Mohammed Salah khôpa a châ.

Tottenham nata Chelsea-zy ta pahnie to ei ta, Manchester United chhaota pahniena lâthlôh a chhih heih hrapa ta, pahnietuhpa a tyh mâh leipa Leicester City ama pahnie.

Tottenham ta ama tlyliah liata 4-0 ta Crystal Palace vaw pahnie ei ta, ama goal 4-pazy he 1st Half chhôhta ama khôpa sai ama châ. Son Heung-min ta goal 2 khôpa ta, Crystal Palace player Patrick van Aanholt ta ama kao lâ pangia tlamawpa ta, 1st Half minute 23 chhôhta Tottenham heta 3-0 ta hmia amâ sah hmâ ha.

Tottenham goal 3-na heta 1st Half a chhâ hlâta liata Erik Lamela ta a khôpa châ ta, he pahniena heta Mauricio Pochettino mohôhpa Tottenham he point liata 3-na lâ kaw kiah ei ta, Crystal Palace deikua 11-na liata amâ tyuh.

Chelsea striker Tammy Abraham ta Wolves 5-2 ta ama pahniena akhaihna liaya 'hat-trick' taopa ta, Wolves châta goal 1 a khôpâ hra.

He kô 21-ta uhtheipa Abraham heta dawh kha chhôhta Hattrick he taopa ta, Frank Lampard mohôhna ry liata Chelsea heta ama khichhaina tlyliah Molineux, pahniena ama to pha kaw. Cha nota, Abraham heta Chelsea châta goal 3 po a pangia tawhta, Romain Saiss ta a luhta a vaw supa cha vaw veipa ta, Wolves châta ama kao lâ a pangia tlamaw hra. He khai tawhta Wolves heta Patrick Cutrone goal hmâpa ta Chelsea heta za patypamâ via heih ei ta, châhrasala Mason Mount ta Chelsea goal 5-na za khô ta, Wolves châta hnabeiseihna a za pachhâsa hapa a châ.

Manchester United ta vâsâta Leicester City cha 1-0 ta Old Trafford liata pahnie ei ta; he goal he Marcus Rashford ta daihti hmiatuapa lâta penalty ama hmôpa tawhta a pangiapa a châ.

Rashford he minute 7-na liata Caglar Soyuncu ta Leicester kao dôhpachhôh liata papao ta, he he Referee ta penalty piepa ta, England international Rashford heta atahmâ Season liata a goal 3-na awpa ta a za khô hapa a châ. Hetana heta atahmâ Season liata United heta â zaopa ta pahniena ei 2 ama to ha hra tahna a châ.