Khizaw University phapazy ta chapaw hawti kô 9-pa amâ chhu!

Kô 9-uhtheipa, chapaw hawti pakha cha atakô kôchhâna liata khizaw liata 'Graduate' patlô theipa hryta hawti chaipa châ awpa ta duasu uahva a chhih kawpa liata a duah hai ta, he chapaw hawti anano patlua kawpa he khizaw liata University phapa nano nanopa zy ta ama University liata achu pazao awpa ta ama thlyu hai. 

He chapaw hawti, a moh, Laurent Simons heta chyhsa so-novâhna lâ thliena liata a IQ he 145 rachhôh châ ta, atakô Di thlâpâ liana heta Electrical Engineering Degree cha Eindhoven University of Technology, Netherlands tawhta a patlô aw. 

Dutch nata Belgium a pathlapahlaopa, Laurent chata, “California he a ziza pha kaw ta, ei sie byuh kaw,” tahpa châ â chu pazaona su awpa chôchâh reih ta.  

Châhrasala Laurent paw, Alexander ta 'Telegraph thâtihbu' a chhona dâhta cha, a sawchapaw cha Califirnia noh khaih ngia kawpa ry tawhtapa puakheipa ta, Oxford University a ngaikhei thei na ta â hnabeiseihnazie a rei. 

US liata University pha chaipa zy liata Professor thaiso kawpa sahlao zy ta he chapaw hawti Laurent he charei pathao ha ei ta, ama University liata Master Degree nata Ph.D tao awpa ta ama reipahmô chyu; chapaw hawti, kô 9 ta uhtheipa, Mobile liata Fortnite nata Minecraft, akhaih hoh kawpa, Laurent châta cha noraih â chhih kaw aw. 

Laurent paw, kô 37 ta uhtheipa, Hãh dawhty (Dentist) Alexander chata, “Ama University nochâchyu liata achupazao awpa ta ama khoh chyupa vâta amâ zaoh kaw sai. Laurent he achupazao awpa ta America a ngai khiahta cha, ano buakhei awpa ta eima chhôhkha chhao eimâ rairuah awpa â ngiah ha aw tahna a chã,” tahpa ta, “Châhrasala Oxford nata Cambridge zy chhao y hra pyly ei ta. Keimo châta cha he University mianopazy he â ryhpaoh chai thlyu aw” a ta.

Laurent vaw pachu ta, vaw chhihthatuhpa (Mentor) hryta mathematics Professor pakha, Switzerland liatapa he Oxford liata a vaw chu ha hrapa chã ta. Maths he Laurent 'subject' pahâh chaipa châ ta, he he achhâpa a reina liata Laurent chata, “Kawh ngaita kaw ta, statistics y ta, geometry y ta, algebra a y hra. Subject liata cha achu awpa a hluh kaw" a ta.

John Wilkes, Dean of Academics, American University, Switzerland, Laurent vaw pachu hatuhpa chata, “Laurent pachupa he thapawh a chhih kaw ta. Hâtipa hawhta nata pitlohpa hawhta einâ pakyh thai rairie" tahpa ta,  “Kô 6 a châ nota châ pachu na ta, kô 16-pa ta â chu theipa â chu ha. Keima ei khokhei chaipa cha Oxford ngai sala tahpa he a châ.,” a ta.

No-âh a chhih kawpa cha Laurent heta atakô 2019 Pamih thlâpâ liana khata Graduate Course he pathao ta, thla 9 chhôhta liahsa a patlô daihmâ ha. Pachutuhpazy ta ama reipa cha, achuhaipa hryta no a vãh chaipa hlâta a lie 3 ta a no â vâh via, ama ta.

Laurent heta a pitloh tita cha Dawhty (Heart surgeon) tlyma Zizabalyhpuhpa (astronaut) châ awpa a khoh tahpa reih ta, Di thla, 2019 liata a vaw 'GRADUATE' tita cha, kô 1994 liata kô 10 deita châpa ta University of Alabama tawhta Graduate-pa Michael Kearney, a chhao ha aw, tahna a châ.

Laurent heta Secondary school (keimolâ ta py 12) cha kô 8-ta uhtheipa châpa ta tlô ta, kô 1 nata â khophie ta uhtheipa a châ no tawhta châ â chu pathao ha. 

Khizaw liana heta Laurent hawhta a pih patluapa na châ hlei leipa ta a châ khiahta la, hnabeidy leipa ta tlao achu hnolo ma y. 

Achuna heta hawh tuna hnei vei la y.

- Telegraph.co.uk