Premier League : Khaih 38 chhôh Liverpool pahnie theipa y khao vei ei

Europe râhhlypi Football League nano nanopa sâpangawh hryta Season pathao pha chaipa ‘Record’ ama taopa cha Liverpool Manager Jurgen Klopp chata, “Aly patlua kaw n’awpa chhâpa za châ muarua hlei vei” a ta.

Pachyhzâ Premier League liata Liverpool heta Roberto Firmino ta 1^st Half liata a goal khôpa hmâpa ta pahniena to heihpa ta, âmo pazituhpa Leicester City hlâta khaih kha ta akhaih chyh via chypa ta, Point 16 ta hmia amâ sah ha heih.

Atahmâ Season EPL liata khaih 21 amâ khaih hapa liata khaih 20 pahniena a to hatuhpa, Liverpool heta kô 30 chhôhta a eikhana awpa ta EPL Nyungiapa chalo thei awpa duasu liata a duah hai ei ta, he ‘Record’ ama taopa he Klopp deikua ta cha a ‘Special’ kaw muaruapa ta a pahno hlei leinazie a rei.

Klopp chata "He Record he eima pahno thlâh ha taraw, anodeikua a ‘special’ kaw muaruana deikua keima liata la za y hlei vei" a ta.

"Nyungiapa eima chalo ha tua leipa ta la adyuhna he chhâ mâh vei. He he âthaona deita a châ chy. Eimâ kholâhpazy he pha kaw sai ei ta, chavâta eima tei hnolo chy awpa â ngiah.

"Pep (Guardiola, Manchester City boss) he a hnabeidy chakhyh aw vei. Keichhao ano hawhpa he ei châ. Atahmâ duasu liata deikua eima yna he a pha kaw."a ta.

Klopp heta Season hmiatuapa nata atahmâ Season akhaih haipa Premier League matches 38 tawhta Point 104 tlai hlao papua ha ei ta, khaih 21 liata goal ama khô lymâ hra.

Pachyhzâ ta London liata Tottenham ama hmiachhyna liata Brazil forward Firmino, ta a phei chavei lâta Liverpool tlôna Goal he khô ta. He akhaihna liana heta Liverpool he Harry Kane a hlao leipa ta akhaihpa, Tottenham heta ama pachhipary ngâthlâh ha pyly hra.

Spurs châta Son Heung-Min nata substitute Giovani lo Celso-zy ta goal khôna ryhpaohpa ama hmôpa, ama hmâh phahnai thei leipa khata ama palôh a pa-ysa kaw aw.

Khaih 38  chhôh Liverpool apielyuna dâh :

• Liverpool heta 2019-2020 Season Premier League liata Point 61 hlao papua ha ei ta – he he Europe League laipa 5 liata Club sâkha ta khaih 21 tawhta Point a hlao papua hluh chaipa Record a châ. 
• Season hmiatuapa nata atahmâ Season pahlyhpa ta Liverpool heta Premier League khaih 38 tawhta Point 104 (W33 D5 L0) hmô ei ta – he he khaih 38-chhôhta Club sâkha Point a hmô hluh chaipa Record châpâ ta, Man City nata Chelsea ta Record ama vaw taopa ama ly ha tahna a châ. 
• Premier League liata khaih 38 chhôh tlai Liverpool he pahniepa ta y khao leipa ei ta; kô 2019 Nawh thlâpâ liata Man City ta ama pahnie tawhna rakha khata pahnietuhpa atyh khao heih mâh vei ei.
• Kô 2006 rakha tawhta Liverpool heta Premier League liata â zaopa ta Goal pathlie khao vei ei (Clean Sheet).