Article : AWNA A SÂHPA CHAKAONA .... - By Rev Dr Laiu Fachhai

AWNA A SÂHPA CHAKAONA LIATA A NGIA TLÔH KHIATA CHA, AWNA A SÂHPA TA Â HNAWPA HAWHTA Y TA HRIA AWPA A CHÂ

Machâ chakaona rai hria leipa tlyma, Pâhsataw chakaona rai hria leipa tlyma, misawnari chakaona rai hria leipa zy tlyma  he vârâh kia leina châ veih ei. He chakaona raizy hria leipa chhao ta, vârâh cha â kiah thei thlâh ha.

Châhrasala he chakaona raizy he, chô lâ tawhta awna, awna a sâhpa (high calling) chakaona raizy ama châpa vâta, he awna a sâhpa chakao rai liata a ngia khohpazy ta cha, a awna nahta â phuhpa ta hro ta eima hria awpa a châ (Ephesis 4:1; Zamai 3:1; 1 Timothy 3:1-15; Titu 1:5-9).

Pâhsataw nata misawnari chakaona raizy deita he awna a sâhpa chakaona rai châ veih ei; machâ chakaona rai chhao he awna a sâhpa chakaona rai a châ hra.

Awna a sâhpa nahta â phuhpa ta hro thei tlôh leipa nata hria thei tlôh leipa khiata cha, he awna a sâhpa chakaona rai liana he eimâ ngia leipa a pha via aw.

Awna a sâhpa chakaona rai hriatuhpazy hrozie awpa nahta a hmie leipa thokhazy:

1. Paôpazypa nata paritheipa taopa.

2. Sôh liata ngâchhih leipa, sôh tlaichhaipa, sasyh a paky khoh leina.

3. Chanô-chapaw châna (sex) liata ngâchhih leina.

4. Haidi haidua, bie khoh thâh khoh châpa.

5. Saiso pualeipa bie reipa.

6. Châna khoh tupa.

7. Hria awpa ta maohphaona piepa patlô leipa (maohphaonazy a daihti ta patlô leipa, y nawpa su raopa liata y leipa - pâhsataw nata misawnari chakaona rai chhochhi he cha y nawpa raopa su liata chhôhkha ta y ta, chakao awpa awna a sâhpa chakaona rai a châ).