India : Dawh 24 chhôhta chyhsa 8,000 hlei Covid-19 hri kiah thiehpa ama y

Atanoh Abeipanoh heta nohkha chhôh (dawh 24 chhôh)-ta India râh liata Covid-19 pasana a kiah thiehpa ama hluh chaina daihti tlôpa ta, dawh 24 a khô hapa chhôh khata Covid-19 kiah thiehpa 8,380 hmôpapuapa châ ei ta, hetana heta India râh liata Covid-19 a kiahpa zydua zie cha chyhsa thysy 1.82 (lakh) ama châ ha, tahna a châ.

India sawhkhâ ry liata Union Health Ministry-ta ama palâsana liata, Chyhsa 193 cha Covid-19 vâta thi heihpa ta, India râh liata Covid-19 vâta a thi hapa zydua zie cha chyhsa 5,164 ama tloh ha tahna a châ.

He thâtih pachhuahpanoh hai no taihta India liata chyhsa 183,143 ta Covid-19 kiah ha ei ta; he hryta ama patlâh hapazy rei leipa ta chyhsa 89,995 cha mohôh haipa châ ei ta. Chyhsa 86,984 rachhôh patlâh hapa ama châ.

He hawhta a châ nona heta, India sawhkhâ chata Akhawhlôhna (Lockdown) chhaih 4-na siekhei awpa ta ryhraona tao ha heihpa ta, târi 30, Chhiepa 2020 taihta akhawhlôhna siekheipa a châ heih aw. Lockdown 4.0 he akohkina athlâzi viapa ta siekheipa châ bâ aw ta; pakhâna nano nanopazy cha hri chahrana su lia tah leipa ta cha pahluh awpa a chhuahna y hai ta; Achhyna-O, Thopi daoh zy pahy pasaih awpa lyu kaw ta, achuna-O nano nanopa deikua achupasiana siekheipa a châ tawhta pahy awpa a châ nata châ lei, mopathi heihpa a châ awpa hawhta Ministry of Home Affairs biepuapa chata a palâsa.