Puhpa F.Lawmkima, EM (Forest) MADC ta a sawchanô hnohta châ a paphaopa

(Puhpa F.Lawmkima, EM(Forest) MADC, Siaha ta a sawchanô Hilda FC.Beireizi (Nono) Delhi liata châ achupa hnohta a châpaphaopa he vaw reih hra tua, nô nata paw thokhazy ta achupa eima hnei thei ngyu aw)

To,

D/Nônô,

Palôh tlokhuhta kyh eima pachâpa nata kyh maniah pachâtuhpa, ei châpaphaopa he pakhâta ta vaw reih la, eima palôh phaozie pahno thai a vaw chhuah mah y.

India râh chaki liata a ypa châ pi ta, _mainland_ liata a ypazy nata kyh totie liata ahlie tu ha pi ta; chavâta, âmozy nâ kho leipa chhaota, na dua tu lei awpa eima kho. Chavâta, rairu kawna chôta, châ eima cha pachusa lyliahpa a châ. A seih tu lei n'awpa ta, bie ei cha ta khohpa vaw reih tua sala.

Covid-19 (hrichhiepa) vâta, chito, râhto, khizawpi bua ta, hmoto atyhpa hawhta y (normal) tlâ khao vei. Chavâta, nâ chuna chhao pazao thei khao v'ei chi. _Curfew, lockdown, facemask, handsanitiser, positive, test, negative, quarantine, social distance, symptom, virus, novel, covid-19, corona etc_ khi biezy khi, Mara reih avaw châ khai haw.
He hrichhiepa vâta na yna su, râh, na vaw ngai awpa a vaw byuh haw.(nâ chuna na patlâ hlâta) A pei kaw, Abeipa ta daihti phapa maniah a piep'a a hnabeiseih sihla e.

_Kiefaw_, he covid-19 hri he a thâtih nama pahno via aw, a palôh lai kaw ta, ano khota ziza tawh tlyma, ano tlaita chyhsa pangai ta ama chhôh a ngiahnao leipa ta, a kiah chiehpa chyhsa (infected person) tawhta ahro lâta a ka lymâpa hawhta ama rei. Chavâta, a hriahra, atlâhnabie reih, hu a sothlu, apakhuthlu, apachhonazie ta, mohropazy nahta ahnia lei awpa, apahla awpa a byuh. He hrichhiepa he ahy ma a oh (vei), ahy chô liata ma a y? pahnopa cha tlôh leipa ta, chyhsa/moto asohsi awpa avaw byuh thlâh ha. Keimo hlâta sawhkhâ bie puapa zydua, "tao awpa" nata "tao lei awpa," na pahno via aw. Na chhôhkhazy pi cha rei byuh leipa ta, awnano, ngo's etc.zy chhaota cha vaw dy ta, châ vaw ly-ua'pa ama khoh kaw; cha cha athei khao vei..pasaih khao leipa avaw châ haw. Na khih nata na râh na vaw tlô tita, lâhlapi tawhta eima cha vaw mokhâh thlâh ha awpa avaw byuh thlâh hapa he palôh pasa â chhih chaimâh. He dei châ vei, na o nata lyu vaw ngai leipa ta, _quarantine center_ na ngai awpa vaw châ ta, eima chavâ thlâ bao na ta aw!...noh 14, a rei dâh chii! Athaisopazy nata biehneituhpazy rei angiah awpa angiah ha tlôh ta.. "Eimâ bohna awpa na a châ" tah ha ei ta, aboh awpa cha khoh tlôh pi...eimâ bohna awpa a châ hnokua cha, maoh tlâ oh chy sihla e, Abeipa ngiachhiena ta avaw pha khai bao na.

Khih nata râh lâ na vaw sie awpa he, sawhkhâ, nâma nata chhôhkha â ryh tahna vâta a châ. Chavâta, na vaw siena lâpi liata rairuna hluhpi a y thei aw, ahy nâ hnawti awpa nata, na nô-u awpa y vei. Abeipa liata a pavaosa la, apalâh kawpa ta na vaw tlô awpa ta thlah eima cha vaw chhâpa aw.

Adyuhna vâ tlyma, sawhkha buabâ vâ tlyma, hmo hrohria vâta eima râh lâta a kaw sie/­a kaw liepa châ leipa ei chi ta, âpaka theipa, "hrichhiepa" covid-19 vâta, avaw siepa/liepa na châ. Nâ cha, râhta a tuapa/a pasiesapa châ leipa chi ta, sanawh chhôhkhata a pasiesapa na châ. Râhta, atuapa, pp.Mh.Tiabi zy, pp.M.Laikaw zy, St.Delson Notlia zy vaw tlôpa, anohâh y kawpa ta dy awpa chhao, dy thai'pa châ khao vei. A pei kaw. Eima daihti ta â chu khao lei tawh tly cha, âmo chhaota ama pachâ thai kaw. Abeipa ta a tlâh ngâsâpa ta vaw tlôkhei ta, eimâ ly ngâsâ. Abeipa ta cha chhihtha chyu ei sala, a tlâh-boh kawpa ta vaw tlô ula, sawhkhâ dâh taopa parao leipa ta eima cha vaw mokhâh aw.

Noh hro, thla hro ta nama vaw tlô tyh no hawhna khata châ khao vei, avaw pasôpakhia kaw leipa la, vaw panyuh-pachyu kaw kha y. A tlâh boh kawpa ta, na râh na vaw tlô theipa vâta Abeipa hnohta alynabie reih la, sawhkhâ, ngo's, vltf, chhôhkha etc.nata awnanopa, nâmo châta bâh leipa ta thlahchhâ ngâthlâh ha penawh hnohta chhao alynabie na reih awpa a châ.

Nônô, Khazohpa ta kyh a cha pachâ, awnanopa, k­hihtlâh nata, chhôhkha zydua ta kyh eima cha pachâ. Nâma dei châ va chi, râh khôtho lâta Marapa a ypa zydua Marârâh nata râh zawpi ta nama vaw tlô awpa he chavaw hâdy pi ta, angiahtiah mah pi. Thlahlôh kawpa ta na râh avaw ngia mah y. Dâh nata phôh parao leipa ta, nama khopa nata peimawhpa tao lymâpa ta, hria lymâ awpa ta râh zawpi, amâ mâ ngâthlâh haw.

Biehneituhpa, ryureituhpazy bie vaw zyh chyu ula, zawpi chhaota rei eimâ vaw ngiah aw. Reingiahna, reiraohna nata Abeipa lâta thlahchhâna chôta he covid-19 (hrichhie) pa he adyuh pi ta, Abeipa ta pahniena a to cheingei aw.

Thlahlôh kawpa ta, aly kawpa ta, asohsi kaw thlâh ha tlôhpa ta, na râh, "Mararâh" vaw tlô ma y. Angiahtiah lei kawpa ta eima cha vaw mokhâh thlâh ha la y..

. _Fc.Lawmkima & fly, Siaha Vaihpi_.