INDIA : State nata UT zydua liata Covid-19 thohna pie pachhina (Dry Run) hnei aw

Khizaw Potlana, Covid-19 pahleipadia awpa ta hmahlana a sie lymâpa liata, India chhao Covid-19 thohna (vaccine) zawpi hnohta pie awpa ta â mâ ha hra. He Covid-19 Vaccine kyh liana heta Central Drugs Standard Control Organization chhao Covid-19 vaccine hmâ theipa a châ theina awpa ta hmahla awpa nata tao awpa a ngiahpazy mohpasia hai ta, he hawhta a châ nona heta India liata state nata Union Territory liata biehneituhpazy chhaota Covid-19 thohna pie papua thei awpa ta amâ chhuahnoh hai hra. He India zawpizy hnohta Covid-19 vaccine pie awpa siekheina heta rairuna â tyh leina awpa ta Pachyhnoh (1 January 2021) heta State nata UT zydua liata he Covid-19 thohna pie pachhina (Dry Run) he siekheipa a châ aw.

He Vaccine pie pachhina (Dry Run) heta he thohna pie hmeiseihpa a châ tita ryhraona awpa nata achhuahnohna dâh awpa biehneituhpazy pahnosa thei aw ta. He heta Covid-19 thohna pie papua tita chhaichhi hmâ awpazy â chhuahnoh chhielie thei ha aw.

Ahyzy ma Covid-19 thohna mo pachhina (Dry run) heta a pahly aw?

Covid-19 thohna piena awpa su liata hriatuhpazy hleikhôta, Health Worker atlyhpa-eihpazy hnohta thohna he piepa a châ tua aw.

Khataih su liata zy thohna he piepa a châ chy aw?

State nata UT zydua liata thohna he piepa châ aw ta. State nata UT zy cha ama khihpi chyu liata he Covid-19 thohna pie pachhina he pachhuahpanoh awpa ta pahnosapa ama châ. State thokhazy cha ama state chhôh District thokha, siepahlie rairu viapa nata, a chaki-chakô viapazy liata a ypazy liata chhao he thohna pie pachhina he siekhei awpa ta pahnosapa ama châ.