US President Biden ta President parohpa Trump hmahlana a phie pathao lymâ haw

US President 46-na, Washington DC liata amâ lypangiapa, Joe Biden-President a pua hapa, Donald Trump hmahlana khâpazy ma a panano aw?

US President Biden thiehpa ta US sawhkhâ ryureina a chaba tawhta sawhkhâ biepuapa ta a palâsana liata cha, "Trump ryureina ry liata hmo athata paraopa/ryureina/bietluna do leipa ama vaw tao hapazy phie pakhua awpa dei châ leipa ta, US râhta hmialâ a pangai lymâ theina awpa ta hmah a la aw” tahpa ta palâsapa a châ.

President Biden ryureina ry liata hmahlana hmiatuapa siekhei awpa palâsapa hry liata – US chyhsa 400,000 tlai hrona a latuhpa, Potlana Covid-19 adyuhna siekhei haipa cha a pachyu viapa ta siekheipa châ aw ta. Sawhkhâ su zy liata cha hmiapahlyna (Mask) a ky cheingei awpa nata, apahlana (Social Distancing) siekheina kyh liata dâh nata phôh a pachyu kawpa ta siekheipa a châ lymâ aw.

He hleikhôta, Potlana hri adyuhtuh awpazy raihriana su awpa (Office) pahypa châ aw ta; Trump sawhkhâ ta WHO tawhta US a vaw puakhei hapa cha – a pazao pakhua heih awpa ta hmahlapa a châ aw.

He hawhta US-ta WHO â hrialâh heih awpa a lyu hapa he UN Secretary-General Antonio Guterres chata aly â chhihzie a reih ha hra.

President Biden chata a sawhkhâ chata khizaw nohkhih athla lymâpa cha a sawhkhâ chata ama pachâ peimawh chaipa hry liatapa a châ, tahpa ta; Biden heta US sawhkhâ biehneina ta 2015 Paris Climate Agreement, liata a hlao heih awpa ta a moh rohthlu ha hra ta; Trump sawhkhâ khata zâkô khata he aryhna tawhtapa he US kha ama vaw puakhei hapa kha a châ.

He hleikhôna heta, President Biden heta Trump ta pasaina a vaw pie hapa Keystone XL Pipeline, Environmentalist nata Native American py nano nanopazy ta amâ vaw dyuh kaw tyhpa tao pasaina cha a phie ha hra. He tikâtheipa palyna awpa ‘Pipeline’ Company miakha ta sôh amâ tôhpa,  $8bn (£5.8bn) hryuhna awpa heta Alberta, Canada tawhta nohkha ta tikâtheipa Barrel 830,000 tlai Nebraska, US lâ a paly thei aw.

He hleoikhôna heta, Trump sawhkhâ ta Muslim râh chyhsazy khitlyna pakhâna a vaw tao hapa cha Biden heta a phie na ta pangiasapa a châ hra.