Football : Cristiano Ronaldo he khizaw liata mopakha ta Goal khô hluh chaipa a châ tlai ma?

Sports khizaw thâtihthiehpa phuahzâhtuhpa hluhpi ta Cristiano Ronaldo cha Italian Super Cup Final liata Juventus ta Napoli 2-0 ta ama pahniena akhaihna liata Goal a khô heihpa vâta khizaw liata goal hluh chaipa hawhta phuah ei ta; Ronaldo heta Goal 760 khô ha ta, he he khizaw liata mopakha ta Club nata râh châta goal a khôpa zydua pahlyhpakhypa ta a khô hluh chaipa a châ ma? tahpa cha hiahrihna a y pathao ha heih.

Cristiano Ronaldo heta Professional football â khaih tua chaina Club Sporting Lisbon châta Goal 5 khô ta, Manchester United châta Goal 118, Real Madrid châta Goal 450, Juventus châta Goal 85 nata a râh Portugal châta Goal 102 a khô hra.

Hmo sianô leipa a vaw luah hapa cha he ary liatapa hawhna heta a châ.

Rec.Sport.Soccer Statistics Foundation (RSSSF) ta (Football ataopasuana a sâhpa liata a khah leipa a hlao leipa ta) mopakha ta goal khô hluh chaipa ta ama vaw ngiapa cha Josef Bican châ ta, ano heta khaih (Games) 530 tawhta Goal 805 a khôpa hawhta ngiapa châ ta, ano pazipa heta Romario, Goal 772 khôtuhpa nata Goal 767 khôtuhpa Pele zy cha RSSSF heta Goal khô hluh chaipa 3-ta ama ngiapazy ama châ.

Khizaw liata goal khô hluh chaipa ta reipa Bican, kô 2001 liata a thi hapa kha, football â khaih chhôh khata Club 5 - Rapid Vienna nata Slavia Prague, Austria nata Czechoslovakia zy â hlaopa ta a vaw khaih tyh ta. A lochona daihti kha kô 1931 tawhta 1955 a châ.

Châhrasala, a goal khôpa ama ngiapa 805 hryta Goal 27 zy kha Rapid Vienna Reserve Team châta nata Professional Club a châ leipazy châta a khôpa châ ta, he hleikhôna heta khizaw ta a pahnokhei leipa akhaihna liata goal a khôpazy chhao pahlaopa a châ hra.

He Official ta amâ pyh leipa goal a khôpazy thypa heta, Bican khata khaih 495 tawhta Goal 759 a khô tahna a châ.

Ronaldo hlâta khô hluh viapa ta reipa Pele nata Romario zaw? Âmo pano goal khôna zie chhao he reipasipasuana a y ha heih – He Brazilian Footballer rônahpa 2 zy heta Goal 1,000 cha ama khô patloh ha rairiepa hawhta amâ reih heih hra.

Atliata liana khata Barcelona liata akhaih haipa Lionel Messi khata Pele ta Club sâkha châta Goal a khôpa zie 643 cha vaw chhao ta... Messi ta a goal khôpa zie a chhao tahpa biethâh a y patawnah heta Pele Club Santos heta Pele heta ama Club châta Goal 1,091 a khô, ama vaw tah para ha heih.

Pele ta a Instagram liata a ropa liata chhao "Leading Goal Scorer of All Time (1,283)" ta â roh hra.

Châhrasala, Pele Goal khôpazy tawhna heta Friendly nata Official ta amâ pyhkhei leipa (Kô 1959 liata Pheisaih team liata a khôpa) zy thy khaipa ta, Pele heta Santos, New York Cosmos nata Brazil châta Goal 757 a khô, tahna a châ.

Romario heta kô 2007 liana khata a Goal 1,000-na a vaw ly heih hra ta – châhrasala Goal a khôpa hry liana khata ‘Youth, Friendly nata pathliena akhaihna’ liata a khôpazy pahlaopa a châ heih hra. He vâna heta Romario kha Official ta a goal khôpa zydua zie cha goal 745 ta a pyhpa a châ.

He hawhta a châpa vâna heta Cristiano Ronaldo cha khizaw footballer hryta Goal a khô hluh chaipa hawhta reipa a châ hapa a châ. Atahmâ nota Ronaldo nahta ama pakhopâ hoh chaipa Lionel Messi heta Goal 719 khô hai ta; Ronaldo hlâta Goal 41 ta a khô chyh via chy hra.