Dr SASA - Nochhi Marasaw nata Myanmar hnabeiseihna

Nochhi Marasaw châta nôpaw a châ thai kawpa nata, Mara Dawhty hryta khizaw pahnopa ta a lâluahpa, Dr.Sasa cha 'Myanmar Special Ambassador to the United Nations' châta raopa a châ.

Dr. Sasa, 'Health and Hope' paduatuhpa he, Myanmar Atlyhna liata Nobel Laureate Aung San Suu Kyi party National League for Democracy (NLD) châta 'Star campaigner' a châ theipa, zawpi palôh a pahnie thei kawpa chyhsa châ ta; atahmâ nota Myanmar pheisaih sawhkhâ vâta râh buana nata atymâna hryta, Myanmar zawpi ta sawhkhâ ama paduapa, Pheisaih sawhkhâ ta a thypathlah hapa ta a paduapa 'CRPH' ta 'Myanmar Special Ambassador to the United Nations' ta a rao. He Dr Sasa, 'Special Ambassador'-ta raotuhpa he 'Committee Representing Pyidaungsu Hluttaw (CRPH)', 'Committee Representing  Union Parliamentary' ama châ. 

He CRPH he Myanmar sawhkhâ ta athypathlah hapa, zawpi atlyhpatlohpazy ta Myanmar zawpi sawhkhâ vyuhpa ta ama paduapa châ ta; Pheisaih sawhkhâ a pyhleituhpa ama châ. Henah sahlao heta United Nations liata Myanmar vyuhpa ta a duah awpa ta Dr.Sasa he ama rao hapa a châ. 

Dr Sasa heta Armenia liata Dawhty â chu patlô tawhta, Myanmar Notla lâchhâh liata a pahrâpa, Myanmar râh liata bia sipasa chaipa hry tahpa tah thei awpa zawpizy cheihchalo awpa ta chakaona raihriatuhpa py 'Health and Hope' padua ta, hmahsiena rai hleikhôta, hnatlâna kyh liata athata hmah a la. England bei sawchapaw, Prince Charles of Wales cha 'Health and Hope Patron' a châ hra. 

Dr. Sasa he Lialaipi, Nochhi Mara khihpi, Chin State chho lâ khih liata a pihpa nata laiseihpa a châ.

Myanmar nata Nochhi Mararâh châta hnabeiseihna noh khaih ngiapa vaw Chhikhei tlai mawh sy.