INDIA : Dâhhaw a khaopa ta CHAVAH ti a palaipa vâta chyhsa 15 thipa ta chyhsa 150 yna chybia pahnopa châ khao vei!

Abeipanohta hmo a tlôpa rarô-y kawpa liata Joshimath, Chamoli District, Uttarakhand liata dâhhawtlo (Glacier) chopa ta, Dhauli Ganga CHAVAH athata palai ta, chhiena rarô-y kawpa a tlô thei awpa duasu liata â duah hai. He thâtih pachhuahpanoh hai nona heta Rishi Ganga power project liata raihriapa (Labour) 150 zy cha ama yna chybia pahnopa châ mâh vei, tahpa ta State Disaster Response Force DIG Ridhim Aggarwal chata a rei. He hawhta a cha nona heta chyhsa 15 ama thipa hawhta India Today ta a palasa.

He CHAVAH to laipa he district hropa Pauri, Tehri, Rudraprayag, Haridwar nata Dehradun zy châta chhao chi â chhih thei awpa hawhta pahnopa a châ váta biesakâ vaw ha ei ta. Uttarakhand Chief Minister Trivendra Singh Rawat chata he tilaipa kyh liata zawpizy cha bie leilôpa tlyma, Video tlyma hiezawh lei awpa ta â haw ta. Ganga CHAVAH a hnia lei awpa ta zawpi bie a ta hra. 

CM Rawat heta he tilaipa vâna heta Abeipanohta daihti peimawhpa a hneipa zydua a hlao tlâ khao leipa ta. Chhiena tlôna su Chamoli tlypa ta hmo yzie achupasia awpa ta a sie ha hra. ITBP nata NDRF zy chhao Uttarakhand chhiena a tlôna su liata a byuhpa nata â ngiahpa hria awpa ta amâ thao ha hra.