MIZORAM : Kô 15 chhôhta HIV/AIDS vâta a thipa 2,877 ama y

Mizoram liata kô 1990 tawhta a sie haipa kô 2000-21 taihta HIV+ hmôpapuapa chyhsa 23,092 ama y ha. He hawhta a châ nota Atlia kô 15 (2006-21) chhôhta HIV/AIDS vâta a thipa chyhsa 2,877 ama y.

Mizoram state AIDS control society (MSACS) ta ama ngiana dâhta, kô a sie haipa kô 2020-21 chhôhta thisaih mopasia hapa 15,843 tawhta HIV+ hmôpapuapa 885 y ei ta, cha cha thisaih mopasia hapa tawhta zakha liata 5.6 a tloh. He daihti chhôh pyly heta nô saw a phaohpa thisaih mopasiapa 8,593 tawhta HIV+ 77 ypa ta, cha cha zakha liata 0.9 a châ.

HIV+ hmôpapuapa hry liana heta kô 25-34 likahta uhtheipa hluh chai ei ta, chapaw 6,396 nata chanô 2,600, ama zydua ta 8,996 ama tloh. Cha cha HIV+ hmôpapuapa zydua tawhta zakha liata 42.59 a châ. Kô 35-49 likah liata HIV+ hmôpapuapa chapaw 3,519 nata chanô 2,075, ama zydua ta 5,594 (zakha liata 26.49%) ypa ta, kô 15-24 likah liata HIV+ chapaw 3,193 nata chanô 1,584, ama zydua ta 4,777 (zakha liata 22.62%) ama y. Kô 50 chô lâta chapaw 725 nata chanô 403, ama zydua ta chyhsa 1,128 (zakha liata 5.34%) y ei ta, kô 14 ry lâ chapaw 308 nata chanô 317, ama zydua ta 625 (zakha liata 2.96%) HIV+ hmôpapuapa ama châ.