PL : Kô 2003 tawhta a eikhana awpa ta City ta Anfield liata pahniena ama to

 

Pep Guardiola nata a nawhtazy chata kô 2003 tawhta a eikhana awpa ta Premier League champions Liverpool tlyliah, Anfield liata pahniena topa ta, Premier League nyungiapa chalo awpa ta a râpasuana liata hmia amâ sahna ama papôhsa via ha heih.

Atliata amâ pie pha kaw tarawpa ta, City Fans-zy châta cha Abeipanohta Liverpool ama hmiachhy awpa he ama thlahzoh kaw ta; Liverpool tlyliah liata pahniena raita ama to thei leipa cha ‘Anfield chhiesana’ hawhta pachâpa ta, Abeipanohta amâ khaih hlâna chhao heta ama thlah lôh vei. Châhrasala, Anfield chhiesana ama phie haw.

Anfield liata 4-1 ta pahniena to ei ta, Point table liata Point 5 ta hmia a sahpâ ei ta, âmo a kaw pazituhpazy hlâta khaih 1 ta amâ khaih chyh via chy hra. He dei châ leipa ta, City he Champion haipa Liverpool hlâta Point 10 ta a sâh via ei ta, kô 18 chhôh ama vaw mokhâhpa ta, Anfield tlyliah tawhta pahniena amâ dikheipâ hra.

City nata Liverpool zy he atlia tawhta cha EPL liata Club pha chaipa miano tah thei awpa châ ha ei ta, he hawhta Club pha viapa duasu hawh tlupo ta a pachâ thei awpa ta Anfield liata pahniena ama topâpa chhochhi he cha City châta aly â chhih pachaih.

City châna heta hmahphaohpa Kevin De Bruyne nata Sergio Aguero akhaih leipa ei ta, First XI liata Striker hmia pahno a hlao kawpa y hra vei ei; châhrasala Liverpool kao chhôh lâ Goal 4 khô ei ta, a hluh viapa chhao khô thei awpa ama châ taraw.

1^st Half liata penalty tawhta goal khô hra vei sala, Ilkay Gundogan akhaih pha ta, 2^nd Half liata goal 2 khôpa ta, City châta khaih 12 tawhta goal 9 tlai he Germany midfielder heta a khô ha.

Abeipanohzâ ta tlyliah liata a lâluah chaipa deikua City Academy tawhta achupapuapa, Phil Foden châ ta. City châta tlyliah kohkituh chaipa nata, Liverpool châta rairuna a taotuh chaipa tah thei awpa a châ. City ta Anfield liata pahniena ama to hnôh chaina daihti liata kô 2-deita uhtheipa Foden kha pitloh ha ta; Anfield chaphietuhpa lâta a kaw laiseih ha hra.

GOAL KHÔTUHPAZY

Liverpool

•        Salah (63'minutes pen)

Man City

•        Gündogan (49'minutes, 73'minutes),

•        Sterling (76'minutes),

•        Foden (83'minutes)