Myanmar chô liata hriena (Sanction) chaluahpa a châ aw - US President Biden

US President Joe Biden chata Myanmar pheisaihzy ta Myanmar ryureina ama ku liata tlokhuh ama soh ha heihpa cha thlaita ama phie lei khiahta cha ‘Hriena (Sanction)’ ama chô liata chaluahpa a châ heih aw, tahpa ta a pachhipary.

Palâsa hapa hawhta Myanmar pheisaih biehneituhpazy chata Myanmar râh chhihtuhpa Aung San Suu Kyi nata râh zawpi atlyhpatlohpa râh luhpa zydua patu khai ha ei ta, Aung San Suu Kyi nata a chhihthapa Party NLD cha atliata Myanmar atlyhna liata pahniena ama tona kyh liata hmo a do leipa a taopa hawhta ama bai.

US President, Joe Biden chata châ papuapa ta "Pheisaihzy heta zawpi khotlyna ta atlyhpa, paduapa sawhkhâ ama parao awpa nata, zawpi khotlyna ama phie awpa châ vei" a tah.

Myanmar pheisaih apielyuzie he United Nations nata UK chhaota ama maochhie kaw.

US heta Myanmar liata zawpi ryureina a y pathao hapa hawhta ama hmôpa vâta Myanmar chôta hriena ama chaluahpazy cha vaw phie ha ta. He hawhta pheisaih amâ pielyu ha heihpa vâna heta Biden chata : "US heta zawpi ryureina a châhkhei lymâ aw ta; Myanmar chôta hriena chaluah heih awpa chhao he pachâpathipa a châ aw." a tah.

UN Secretary-General António Guterres chata Myanmar pheisaih apielyuzie cha "Zawpi ryureina a kaw y haipa chôta peihriana lai kawpa", tahpa ta UN security council chhao atyupahmaohna aparachhihpa (emergency meeting) hnei awpa ta amâ chhuahnoh ha hra.

Myanmar cha kô kha chhôh châta râh buapa ta phuahpa châpâ ha ta, pheisaihzy ta a chhô-a zâ ta khihpi ama chahlô-cha-ei lymâ ha heih. Suu Kyi chata zawpi cha pheisaihzy hmahlana a dyuh awpa ta a pasyu ei.

- BBC