Siaha Satlia Aizawl FC a pahniehna MC Malsawmzuala he ahy maw?
Atahmâ nota I-League, India râh liata Football ataopasuana laipa nata, hlô chaipa hrytahpa liata a pie pha kawpa nata, Aizawl FC a pahniehna tah thei awpa, Mc Malsawmzuala he ahy ma châ ta? Khataih tawhta ma a Football khitlyna a pathao tly?
Siaha liata a pihpa nata a laiseihpa, a Football khitlyna, Siaha tawhta pathaotuhpa, Mc Malsawmzuala, a viasanahzy nata chhôhkhazy ta Beibei tahpa ta ama awpa he târi 23 Di 1993 khata Siaha liata vaw pih ta, a paw he Puhpa MC Thangvela (L) a châ.
Siaha liata Local Football liata Club laipa nata hlôpa, Siaha Vaihpi Football Club, (United FC) liata akhaih tyhpa ta, Siaha zawpi ta â pielyuzie nata Goal a khô theipa vâta â khaihpa a mo pha ama tah kawpa a châ.
Siaha Local Football tawhta Mizoram Premier League Club-zy ta a phazie thlai hmô ei ta – MPL Club – Chandmari FC, Chhinga Veng FC-zy ta lapangiapa ta, MPL liata chhao a pie chhie vei. Kô 2018-2019 MPL Season liana chhochhi khata cha Chhinga Veng FC Jersey a kyna chôta MPL liata Goal a khô hluh chaipa a vaw châpa a châ.
Hmo phapa cha nyuthu thei awpa a châ leina hawhta, MC Malsawmzuala (Beibei) phazie he thlaita Mizoram liata Club laipa nata, I-League Champion chhao a vaw châ hapa, Aizawl FC ta hmôpa ta, thlaita ama lapangia ha heih hra.
I-League Champion parohpa, Aizawl FC châna heta zâkô 2020 Nawh liana khata ‘Professional’ akhaihna hmiachhy tua chaipa ta, Gokulam Kerala F.C. hmiachhy ta. He akhaihna liana heta Minute 71-na liata Substitute tawhta a zâ ngiapa ta, â pie pha ngâsâ.
I-League Season a sie haipa liata Beibei he Aizawl FC hmiatlâh pa-ichatuh chaipa châpa ta, ama hmiachhypa Club Defender-zy châta â hnykhawpa nata, pakhâ a ru kawpa a châ. Atahmâ I-League Season liata Player mo pha chaipa pakha châ haipa ta, a tao tyhpa hawh pyly ta Goal chhao a khô lymâ ha heih hra.
Season heihpa liata cha ataopasuana lai viapa hawhta pachâpa, ‘Indian Super League’ liata hmô mah pi tah thei’pa châ khao vei...
No comments