Chhaolô khih liata paw pakha ta chapaw hawtipa tâkô ta â chhawsao!

Hriatuanoh (Târi 15 Pamih, 2021)-pa khata Siaha tawhta khih a hla tu leipa, Chhaolô khih liata hmo rarô-y kawpa tlôpa ta, chapaw hawtipa pakha, kô 9 rachhôhpa cha paw pakha, kô 30 rachhôhta uhtheipa ta tâkô ta a chhawsao!

Biehnawhta a palâsana liata, Puhpa Ismael sawchapaw, kô 9-ta uhtheipa Beihneipha cha, Puhpa N.Beihrokhai, kô 30 rachhôhta uhtheipa ta tâkô ta chhawh ta, hawtipa he athata hmah phaoh ta; Siaha thohna-O lâta a zâ râkhei awpa amâ chhuah nota a hrona a pahlei hapa a châ. Biehnawh chata, hawtipa tâkô ta chhawh tyhpa he palôhrupa lâta rairuna a hnei tyhpa, chyhsa a tloh tu leipa hawhta reipa a châ.

HMO TLÔNA DÂH :

He vâduana a tyhpa chapaw hawtipa, kô 9 ta uhtheipa Beihneipha (S/o Puhpa Ismaela) nata a viasa pakhazy cha Machâ N. Hralo (L) sawchapawpa Satlia N. Beihrokhai (Beihneipha a chhawhsaotuhpa) heta Kuvâ chalei awpa ta rai a tuah ei.

Kuvâ cha kei chalei ei ta, hawtipa Beihneipha he anodeita O chhôh lâ a ngiapa ta Kuvâ cha za pie ta, he liata N. Beihrokhai heta hawtipa Beihneipha he vaw patu ta, tâkô hmâpa ta ku a vaw pathla pâ hapa hawhta reipa a châ. 

A viasapa chata Beihneipha awhsâh ngâpa a thei na ta za mohpasia ta, hmo tlôpa a pahno na ta chi kawpa ta athata awh hra ta, ama Opa liatahpazy ta amâ vaw râhnao.

Beihneipha pôhpa liata hmah athata vaw y hmâ ha ta, a hrona pachha awpa hnabeiseihpa ta Siaha lâ za siekhei awpa amâ chhuah ngâhai nota pasa tao thei khao leipa ta vâduachhih kawpa ta â pahâ haw.

A chhawhsaotuhpa N. Beihrokhai he paritheipa ta a pabua tawhta a palôh a ki tu khao leipa a châpa hawh eima biehnawhta palâsa ta, a pha viana daihti lia cha chyhsa tyhpa (normal) hawhta pha kaw heih tlôh ta, chhôhkhazy chhao ta ama buakhei kawpa a châ.

Khitlâh liata rairuna hropa a y via pathlei lei n'awpa ta tahpa ta N. Beihrokhai he Chhaolô MTP zy ta Police Outpost yna Lôbô kiah liata Police zy ku liata ama za hlâ ha.

Vâduana a tyhpa ta a hrona pahlei hapa, chapaw hawtipa Beihneipha he ama Unawh 4 hryta chapaw a y chhôhpa châ ta, a nô nata paw eima taokhei ngaita. Khazohpa ypâ mawh ei sy

Biehnawh : Various Sources