Myanmar Buana : Chutyhnoh khata chyhsa 11 ta hrona ama pahlei heih - Myanmar buana a paru via lymâ

Myanmar pheisaihzy ta Chutyhnoh (20.4.2021) khata Shan State, Yangon nata Mandalay su nano nanopa liata chyhsa 11 thie heih ei ta, heta heta târi 1 Hmypi 2021-pa tawhta Myanmar Pheisaihta sawhkhâna ama la tawhta Myanmar liata Pheisaih ku liata a thi hapa zydua cha 231 ama tloh ha, tahpa 'The Irrawady' chata a palâsa.

He hrona a pahleipa zie he ama pôh via lymâ na ta pangiasapa châ ta. Pheisaihzy ta zawpi sawhkhâ Padua heih awpa ta ahnawtuhpa zawpi ama tlahnaona liata hmah a phaohpa hluhpi y ei ta, he hry liata thokha cha ama hrona taihta pahlei thei awpa duasu liata amâ duah hai.

Shan state chho lâ, Aungban Township liata Chutyhnoh khata Police nata Pheisaihta meithei ama papana liata chyhsa 8 ama thipa ta reipa châ ta; chyhsa vâro ta hmah pasa kawpa ama phaoh hra. 

Kayah state khihi, liata nô pakha nata paw pakha, kô 47-ta uhtheipa U Shan Pu zy cha Pheisaih theisâlô ta khai ta. U Shan Pu he zâlâ dawh 2 p.m., ta a thipa hawhta reipa a châ.

Myingyan, Mandalay liata kô 27-ta uhtheipa, Aung Ko Ko Khant cha Chutyhnoh my khata thi ta. Ano he târi 15 Pamih kha meithei ta a hmia liata kapa châ ta, Pachyhnoh khata ama kana hmah he a THIKHEIPA a châ.

Burma pheisaihzy ta Pheisaih sawhkhâ kholeina palâsatuhpa zawpizy cha tlahnaona chi nano nanopa hmâpa ta tlahnao hra ei sala, zawpi he hnôh a sy leipa ta, lâthlôh a chhihpa ama pôh via ngâkaw.

Târi 1 Hmypi, 2021 tawhta reipatipa ta Pheisaih ku taopa ta a thipa ama hluh chaina su, Yangon khihpi liata cha thina ta zawpi hnôh pasysa hlei vei! Thyutlia hluhpi ta sawhkhâ kholeina ama palâsa pazao lymâ hai.

Thaketa Township liata Pheisaihta meithei ta zawpi ama kana liata hmahphaohpa y chili ei ta. KyaukMyaung liata chyhsa 10 zy cha Pheisaihta ama patu tahpa ta reipa a châ.

South Dagon liata Pheisaih nata Police zy ta chyhsa O a ngiahnao ei ta. Chyhsa 2 meithei ta ka ei ta. A luh liata ama kapa 1 he a thipâ ha.

He pheisaihzy heta Township nano nanopa liata chyhsa patu hôlô ei ta, he ama patupazy he lâthlôh pakhâna, zawpi ta ama taopazy pathai awpa ta tah raruah ei ta; Tamwe township liata chhochhi cha, Pheisaih nata Police zy heta paw pakha patu ei ta, athata rai ama pahriasa raruah hleikhôta, chapie ei ta, I hawhta zy lâthlôh liata ama palysa.

- The Irrawady