Myanmar : Pheisaih sawhkhâ ku a chha kaw chy - Hriena nata Aheisai awpa chi ma pi' ama tah.

NEW YORK (Reuters) - Myanmar Pheisaih sawhkhâ chata Khizaw râh nano nanopa ta ama chôta hriena (sanction) chaluahpa ta, amâ heisai (Isolate) lymâpa chhao ta pei tah hlei vei ei, tahpa ta United Nations official pakha ta Pakhynoh khata a rei. He UN Official heta Myanmar Pheisaih sawhkhâ cha, zawpi ryureina thlaita ama Padua para lei khiah hriena chahrâh kawpa chaluahthlupa ama châ aw, tahpa ta a chhopa hawhta a rei hra.

'U.N. special envoy on Myanmar', Christine Schraner Burgener, ta a reina liata cha Pakhynoh khata Myanmar liata Nohkha chhôhta thisaih a loh hluh chaina daihti tlôpa ta, chyhsa 38 ama thi, tahpa reih ta. Schraner Burgener heta Chutyhnoh khita U.N. Security Council liata Myanmar kyh he a reih aw.

Schraner Burgener heta Myanmar Pheisaih sawhkhâ liata Deputy Military chief Soe Win nahta bie amâ chhona dâh reihpa ta, khizaw râh nano nanopazy ta ama hmotaopa vâta hriena chahrâh kawpa ama chaluahthlu awpazie nata amâ heisai (Isolate) awpazie biesakâ a vaw tahpa ta, “Pheisaihta einâ chhyna ei cha : ‘Hriena he cha vaw tao kôzaw ha pi ta, eimâ boh lymâ chy hra’,” ama tahnazie New York liata Reporter ano apakyhtuhpazy chhopa ta, “Khizaw ta a châ heisai aw ei, tahpa ta biesakâ a vawpa chhao Myanmar Pheisaih sawhkhâ chata : 'Viasa chyhta akaolâhna dâh eimâ chu thlâh ha aw’.”tahpa ta amâ chhynazie a reih hra.

Notla râh - United States, Britain, Canada nata European Union, zy chata Myanmar pheisaih sawhkhâ chôta hriena ama chaluah haipa cha a chahrâh viapa ta siekhei awpa ta pachâna hmâh hai ei ta. Manôh 15 yna U.N. Security Council chhao ta Myanmar duasu ama pachâ peimawhzie ama palâsa nota, Russia nata China, ta Myanmar râh liata hmo a tlôpa cha ama râhchhôh hmo (Internal Affairs) tahpa ta reikah pachyu kawpa ama papuapa vâta, maochhiena reikah ama papua thei mâh leipa kha châ ta.

He kyh liana heta      Schraner Burgener chata “Russia nata China heta he hmo a tlô haipa he Myanmar râhchhôh buana dei châ vei na, he bia (Region) châta a ichaleina tlôkheituhpa a châ tahpa he thlai ama pahnothai na ta ei hnabeiseih,” a tah.

Schraner Burgener heta Myanmar Pheisaih luhpa bie â chhopa Soe Win ta “Kô kha khô lâta Atlyhna pachhuahpanoh amâ chhuah.” tahpa ta a chhonazie a rei hra. 

Myanmar Pheisaih sawhkhâ he ama ku a chha kaw chy.