Maharashtra : Ngapatutuhpa vâhneipa

Saopi vâsua a paru lichih daihti khô ta, sawhkhâ ta sao a tla hapa vâta tilaipi/tipi liata nga patupa thla kha thla no chhôh a pakhâ tawhta, Palgher, Maharashtra liata ngapatutuhpazy chata ama balyhzy pachhuahpanohpa ta, tipi liata nga patu awpa ta amâ thao haw. Daihti vâropi chhôh nga patu thei leipa ta daihti ama hmâ tawhta, tipi liata nga patu awpa ta ama sie heih tua chaina liata vâhneina amâ tyh awpa he pahno chhielie mawh ei sala cha, alyna vâta ama raithlih ama palosa cheingei aw!

Chandrakant Tare, Palghar liatahpa nata a viasa pachariepazy cha nga patu awpa ta August 28 ta balyh kiahpa ta tipi lâ ngai ei ta. Ama balyh moh he Harba Devi châ ta, nga patu awpa ta balyh cha Wadhwan ngaipa ta ama hia lymâ haw.

Tare pachâna liata cha he nga patu awpa ta amâ thao heih theina eikhana liana heta vâhneina no-âhchhihpa ama tyh aw tahpa rai a lâ thlyu vei. Tare nata a viasazy heta ngasa mâ ru kawpa, 'Ghol Nga', 'Tipi Ngôh (Sea Gold) ama tahpa 157 tlai ama patu thlâh haw. He hawhpa nga, 'Ghol Nga' ama tahpa he thohna (medicinal and pharmaceutical) châta hmâpa a châpa vâta Hong Kong, Malaysia, Thailand, Indonesia, Singapore, nata Japan lianazy ta cha a mâ ru ta, amâ pato leipa a châ.

He Nga ama patupazy he Murbe, Palghar liata a mâ a ngâh hluh chaipa hnohta lilâhpa châ ta. A zydua heta Uttar Pradesh nata Bihar-liata su a hneipa sôhpaliepazy ta Rs thysâh 1.33 (crore) ta ama chaleipa khai ha ei.

He nga he a 'scientific moh' cha 'Protonibea Diacanthus', châ ta. A pôhpa pachiahpa to he athuthâpa (cosmetics), thohna (medicines), Dawhtyzy ta chyhsa ama â nota ama biena pala, ano khota zao theipa (thread making dissolvable stitches in surgery) taona châta hmâpa a châ.