Cristiano Ronaldo : A thâtih na pahno leipazy

Sipasana, rairuna nata atymâna khizaw liata a hawti via no daihti hmâhpa ta, chyhsa thatlô chaipazy hmahta a laiseihna khizaw hawhpa liata laiseih ei sala, a duahpapua thlyu veih ei, tah thei awpa duasu tawhta hnabeidy leipa ta tei hnolopa ta, khizaw Footballer pha chaipa pakha a kaw châ theipa, Cristiano Ronaldo thâtih na pahnoleipa tlyma, na vaw pahno hapazy tlyma a chyhta eima palâsapazy he vaw reih hra tua ma y.

Chhôhso rônahpa a phaohpa 

Ei kha cha Ronaldo heta Gaza, Palestine liata hawtipazy baona awpa châta Football ataopasuana tawhta a daopa, ‘Golden Boot’ cha zuahpa ta, a sôh hmôpa zydua cha Gaza liata hawtipazy baona châta tlokhuh a hmâh khai ha. He hleikhôta ano he ‘Save the Children’ nata ‘The Mangrove Care Forum’, Indonesia liatahpazy châta ‘Ambassador’ a châ hra. 

A moh hmeiseihpa 

Ronaldo moh hmeiseihpa cha ‘Cristiano Ronaldo dos Santos Aveiro’ châ ta. A moh he US President parohpa, Ronald Regan moh pachyupa ta bipa châ ta, Ronald Regan he Ronaldo paw heta a pasâhsa kaw tyhpa vâta a moh he a sawchapawpa moh liata a bi hapa a châ. 

Chhôhkha 

Cristiano Ronaldo paw Jose he chyhsa sahdô mohôhtuhpa (Gardener) châ ta, a nô Maria he beihchhotuhpa nata O pathaituhpa a châ. 

Siku tawhta papuapa a châ Cristiano Ronaldo he kô 14 a châ nota ama Pachutuhpa pakha cha dyuchhai ta a vawhpa vâta siku tawhta papuapa a châ. Ronaldo chata he hawhta â pielyuna chhâpa liata ama pachutuhpa chata a mohnao tu hapa vâta a châ, a ta. 

Châh-ao pasana a hnei Ronaldo he kô 15 a châ nota châh-ao pasana a hnei tahpa hmôpapuapa châ ta, â awpa a byuhpa pasana a hnei tahpa pahnopa a châ. 

Mohropazy châta a thisaih khâ a pie tyhpa a châ Thisaih khâ a pie tyhpa a châ hleikhôta, Footballer hropazy hawhta a pôhpa liata ‘tattoo’ a chhuh tlâ vei. Sahma doh beih leipa ta, pa-ôpazypa tao beih hra vei. 

Awna moh (Nickname) Ronaldo he a hawti via nota cha ‘chathuh’ tahpa ta aw tyhpa châ ta, achhâpa cha akhaihna liata a viasanah ball kei pie ta, a viasanahta ball cha kaochhôh lâ ama chapie pangia lei khiahta cha a cha tyhpa vâta a châ. He hleikhôna heta chyhsa thokha ta ‘Kheihtataw’ tahpa ta aw tyh ei ta, akhaihna liata ahy ta hmahta amâ chadai pha tyh leipa vâta a châ. 

Goal khô hluh chaipa Cristiano Ronaldo heta UEFA Champions League thâtih liata goal khô hluh chai ta. He hleikhôna heta Champions League nyungiapa ei pangawh chalo ha ta, he he player pakha ta Champions League thâtih liata nyungiapa chalo hluh chaipa 2-na a châ. 

Chanô patupakhipa biebuapa Kô 2005 liana khata, Ronaldo he chanô patupakhipa biebuapa vaw hnei ha hra ta. London liata hotel miakha liata chanô a patupakhipa hawhta baipa a châ. Châhrasala a patupakhi tlai na tahpa pasiana a y leipa vâta ama papua lilaw heih. 

Sociology course University of British Columbia, Canada liata achuna Opi miakha ta Cristiano Ronaldo thâtih cha ‘sociology course’ miakha hawhta amâ chu.